ای بشر دقتله باخسان متن تاریخه اگر
سن گوررسن عالم امکانیده اولموش نلر
چوخلاری ظلم ایلیوب جور و جفادن دویمیوب
بعضیلر شکر ایلیوب حمد و ثنادن دویمیوب
بعضیلر ظالم ولی بعضیلری مظلوم اولوب
بعضیلر شاد و خرامان بعضیسی مغموم اولوب
بعضیلر قدرت تاپوب ظلم فراوان ایلیوب
ئولدوروب انسانلاری ظلمنده طغیان ایلیوب
قالمیوب اما اثر نه ظالم و مظلومیدن
شاد اولانلاردان نده دنیا بویی مغمومیدن
قالماز آخر فانی دنیاده غنی و نه فقیر
جانینی جانانه تسلیم ایلیر خرد و کبیر
یاخشینی یاد ایلیوب آینده لر رحمت دیر
ظالمه رحمت یاراشماز کیم دیر لعنت دیر
چوخلاری ظلم ایلیوب دنیاده آل حیدره
رحمته یوخ لعنته واصل اولوبلار یکسره
ظلم ائدن اشخاصیلردن اولدی هارون الرشید
حیدرین اولادینه چوخ ظلم ائدوبدور اول پلید
شیخ صدوق ایلوب روایت راوی عالی مقام
بیر جلودی آدلی شخص اولموشدی هارونه غلام
گر یازام شخصیتین عالمده خوار و پستیدی
آیری ظالملر کیمین دنیایه چوخ سرمستیدی
چوخ تلاش ایلردی هارونین وئرن دستورینه
راضی اولمازدی او نامردین ولی رنجورینه
بیر گونی هارون ظالم وئردی فرمان ای غلام
آل هاشم هر نه واردور غارت اولسونلار تمام
شهر یثربده گرک آل علی گول تک سولا
ایستسه هر کیم علینی قلبی محنتله دولا
هارونین دستورینه شخصا اطاعت ایلدی
یثربی قصد ایلیوب فورا عزیمت ایلدی
چاتدی تا شهره جفائیله اهانت باشلانوب
هاشمیون ائولریندن ظلم و غارت باشلانوب
تا خبردار اولدی بو فرمانیدن موسی الرضا
اندرونه اهل بیتین جمع ائدوب اول با وفا
تک دایاندی پشت درده با دل پر خون ولی
دوگدولر باب رضانی آچمادی اما علی
ائتدی فرمایش او نامرده اودم اول مقتدا
اهل بیتیم قورخوشا اولما بو دنیاده رضا
اولمارام راضی حریم امنه نامحرم گله
اهل بیتیم قورخوشا یا دیده سیندن نم گله
غیرت الله اوغلویام من غیرتیم ائتمز قبول
من رضایم سن رضا اولما اولام من دل ملول
منتظر قال پشت درده اندرونه من گئدوم
هر نه وار صحن و سراده ئوز الیمله جمع ائدوم
الغرض امر امامی ایلیوبدور چون قبول
منتظر قالدی گئدوبدور داخله سبط رسول
جمع ائدوب مولا ائویندن هم لباس و هم طلا
قویمادی اهل و عیالی قورخوشوب ائتسون نوا
چون گتیردی محنتیلن حجت ذات ازل
تا آلوب گئتدی جلودی ایلدی ترک محل
وار یری عرض ایلیاخ دنیاده مولا یا رضا
قویمادون دشمن الیلن عترتون غارت اولا
کاش اولیدون کربلاده ای امام انس و جان
غارتین دستورینی وئردی او هارون زمان
آغلاراروخ عالم بوئی جدون حسینون حالینه
کربلاده بیر نفر رحم ائتمدی اطفالینه
اود ووروبلار خیملر یاندی چیخوب عرشه نوا
آچدیلار ال غارته اخیامیدن اهل جفا
اهل بیت مصطفادن طاقت و تاب آلدیلار
اول حرم آهولرین ظلمیله دامه سالدیلار
باغلیوبلار عاقبت قیزلاره راه چاره نی
زوریله خارج ائدوبلر گوشیدن گوشواره نی
بیر قولاقدان گوشواره چیخسا زوریله اگر
گوشواره یا سینار یا که قولاقی یاره لر
یازمارام اولدی نلر ناله چیخوبدور آفاقا
گر باخیدون هر قولاقه قان سوزردی تپراقا
بی حیالر ظلم ائدوب جور و جفاده دوردولار
استقامت کیم ائدوب غارتده قمچی ووردولار
آلدیلار ظلم و جفائیله زر و زیورلری
غارت ایلوبلر تماما اهل بیت حیدری
یازما غارتدن داخی (سالک) دونوب قانه ئورک
عترت پیغمبره یاز اولمادی کیمسه کمک
آغلیاندا هر باجی الدن گئدن قارداشینه
وئرمیوبلر تسلیت قمچی ووروبلار باشینه
- چهارشنبه
- 12
- خرداد
- 1400
- ساعت
- 22:5
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه