دوشدی او گونکه مقتله مولاسی زینبین
باشلاندی محنت و غم عظماسی زینبین
دشت بلاده قولاری باغلاندی ظلمیله
بی حد اولوب باشیندا قضایاسی زینبین
ایستی قوم اوسته قالدی حسینون جنازه سی
قلبینده قالمادی ولی یاراسی زینبین
قلبی یارالی باشدا قرا میندی ناقیه
محمل اولوبدی جبریله مأواسی زینبین
ترک ائتدی کربلانی اولوب کوفیه روان
دشمنلریندن اولمادی پرواسی زینبین
صبر ایلدی بلالره درد و بلا چکن
حیران ائدوبدی صبری شکیباسی زینبین
چاتدی الیکه کوفیه اول مرتضی سیَر
لبریز اولوبدی محنت دریاسی زینبین
گوردی گلوبله کوفه لیلر پیشوازینه
شامه دونوبدی دیده ده دنیاسی زینبین
دوتدی یوزون اسیر بلا ال چالانلارا
فرمایش ائتدی طاقتین الدن آلانلارا
گرچه دچار محنتوخ عزت بیزیمکیدی
شوکت بیزیمدی شأن و شرافت بیزیمکیدی
آل پیغمبروخ ایکی عالمده سرفراز
قرآن بیزیمدی شاه ولایت بیزیمکیدی
گر ایسته ساخ بیز ایلیروخ تپراقی طلا
قدرت بیزیمدی جود و سخاوت بیزیمکیدی
دار فناده دینیزی دیناره ساتمسوز
سیرت بیزیمدی دین و دیانت بیزیمکیدی
آیا روادی ال چالسوز آل حیدره
فکر ایلوسوز جهاندا جهالت بیزیمکیدی
راه خطانی طی ائدوسوز رهبریز کیمین
غفلتده یاتمسوز که فضیلت بیزیمکیدی
لعنت گله جهاندا امیر و وزیریزه
غصب ایلیوبله دهریده دولت بیزیمکیدی
فخر ائتمیون که ایندی بیزه غالب اولموسوز
نصرت بیزیمدی جاه و جلالت بیزیمکیدی
شرم ایلیون بو قدری بیزه ائتمیون جفا
دلدن یارالیوخ داخی سیز وورمیون یارا
کرب و بلاده سولدی بیزیم گلستانیمیز
ظلم و جفادن عرشه اوجالدی فغانیمیز
دشت المده ظهره کیمین آز زمانیده
قانه بویاندی یکسره پیر و جوانیمیز
دینه فدا اولوبدی علمداریمیز بیزیم
قولسوز دوشوب قوم اوسته قالیب قهرمانیمیز
اوچ پر اوخیلا اوخلادیلار دیلسیز اصغری
یاده دوشنده اودلانوری جسم و جانیمیز
ئولدوردولر حسینیمیزی یاندوخ آغلادوخ
الدن گئدوبدی قالمادی تاب و توانیمیز
اوت ووردولار شراره چکوب یاندی خیمه میز
بیر قوش کیمین داغیلدی او دم آشیانیمیز
بیز آغلادوخ حسینه بیزه قمچی ووردولار
حددن آشوبدی دلده غم بیکرانیمیز
دیل یاره سی شماتت ائدوب وورمیون بیزه
سئل تک رواندی یوزلره اشک روانیمیز
درد و غم و مصیبتیمیز قورتاران دگول
(سالک) قوتار که محنتیمیز قورتاران دگول
- پنج شنبه
- 13
- خرداد
- 1400
- ساعت
- 13:13
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه