کیمدی زهرا کرم و جود و سخا دریاسی
کیمدی زهرا . شرف و حجب و حیا معناسی
کیمدی زهرا . ادب و مهر و وفا دنیاسی
شانه باخ شانینه قرانیده چوخ آیه گلوب
جان فدا شوکتینه عالمه پیرایه گلوب
کیمدی زهرا که اولوب مفخر نسوان جهان
کیمدی زهرا که اولوب پیکره ی خلقته جان
کیمدی زهرا که اونون وصفینه قاصردی زبان
حضرت لم یزلون خلقتینون محوریدی
احمدین ذات احد وعده وئرن کوثریدی
کیمدی زهرا که بئله منزلتی والادی
اونی تعریف ائلیین ذات حق یکتادی
نه یازوم مدحتینه دهریده بی همتادی
فاطمه تکدی قسم ذات حق یکتایه
گلمیوب گلمیه جاق مثلی اونون دنیایه
مدحت فاطمیه دفتر و دیوان یازیلوب
شأن والاسینه باخ مدحی فراوان یازیلوب
خلقت ما خلقه خلقتی برهان یازیلوب
چوخلاری شرح ائلیوب منزلت زهرادن
یازیلانلار هاموسی قطره دی بیر دریادن
کیمدی زهرا بو قدر شأن و جلالت واریدی
کیمدی زهرا که بیزه لطف و عنایت واریدی
کیمدی زهرا که اونون حق شفاعت واریدی
روز محشرده بلی آیری قیامت ائده جاق
حیدرین شیعه سین اولده شفاعت ائده جاق
آتاسی ئولدی سالوب باشه قرا صبر ائلدی
دهریده امت اونا ائتدی جفا صبر ائلدی
دینه خاطر دایانوب چکدی بلا صبر ائلدی
اریدی غمدن اونون پیکری چوخ اولدی نحیف
دورا بیلمز ایاقا جسمی کیمون اولسا ضعیف
جسمی تحلیله گئدوب دوشدی ئولوم بسترینه
دئمه دی دیلده کی نسکلرینی دلبرینه
بیر فقط ائتدی وصیت نگران همسرینه
دئدی ای روحه روان گل سنه قربان ئولورم
یئتیشوب پیک اجل زار و پریشان ئولورم
دویموشام جانه عم اوغلی ائدورم آه و فغان
قدیمی غملر اگوبدور ائلیوب مثل کمان
گئدورم دار بقایه ولی سیزدن نگران
عزتین جامه سینی عمر بویی سویمامیشام
زینبین و حسنینیمدن هله دویمامیشام
اولموشام ظلمون الیندن نجه گور غرق محن
ئورگیم غمله دولوبدور منه غربتدی وطن
گوندوز ئولسمده گئجه وقتی ائله غسل و کفن
ایستورم گلمیه تدفینیمه دونان زمان
مخفیانه منی دفن ائتگیلن ای مونس جان
چکدیم آز عمروده من درد فراوان ئولورم
بولورم اولمویاجاق دردیمه درمان ئولورم
باشیم اوستونده عم اوغلی اوخی قرآن ئولورم
یورقونام دهریده چوخ جور و جفادن گئدورم
یئتیشوب سینمه جان دار فنادن گئدورم
(سالک) عمرونده منیم غملریمه آغلیاجاق
یازاجاق محنتیمی سینه لری داغلیاجاق
اگنینه قاره گئیوب باشه قرا باغلیاجاق
سائل درگهیمیزدی اونا احسان ائدرم
روز محشرده ئوزوم دردینه درمان ائدرم
- جمعه
- 14
- خرداد
- 1400
- ساعت
- 11:11
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه