نیلییم یارب گئنه آب و هوا آلوده دی
نی فقط آب و هوا کل فضا آلوده دی
بسکه قلبیم قان اولوبدور گردش ایامیدن
آز قالور جانیم چیخا صحن و سرا آلوده دی
دوشموشم درده دواسین تاپمیشام عمرومده لیک
چاره اولمور دردیمه چونکه دوا آلوده دی
مات و حیرانم دعاده بس نیه یوخدور اثر
مستجاب اولمور ندن گویا دعا آلوده دی
ایندی بیر دور زماندی یوخ عدالتدن خبر
دوز قضاوت ایلین آزدی قضا آلوده دی
درهم و دیناره خاطردی جهان فانیده
چوخ خیانتلر اولور پی دن بنا آلوده دی
بعضیسی کسب معاش ایلور ربادن روز و شب
درکی یوخ درک ایلسون فعل ربا آلوده دی
هر کیم عمرونده ربا و رشوه دن تأمین اولا
فرقی یوخدور شاه اولا یا که گدا آلوده دی
ایلین چوخدور خیانت دین اسلامه یقین
هر کیم ائتمور دینینی دینه ادا آلوده دی
کاش اولا اولگونکه (سالک) مهدی صاحب زمان
کعبه دن اولسون عیان دار فنا آلوده دی
گوزله یول حتما گلر عصر و زمانین صاحبی
پاک و اصلاح ایلیر هاردان هارا آلوده دی
- شنبه
- 15
- خرداد
- 1400
- ساعت
- 18:30
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه