من ام بنینم منه دریای غم آغلار
غملر یورولان وقتیده درد و الم آغلار
من آغلیارام حالیمه قانلی علم آغلار
یانام غم و محنتده چیخار عرشه فغانیم
محنتلر الیندن یورولوب جسمیله جانیم
من بختوریدوم واریدی عزت و جاهیم
اولموشدی علی شاه ولا هادی راهیم
عباس و حسین و حسنیم پشت و پناهیم
الدن هاموسی گئتدی بئله خون جگر اولدوم
عمرومده جلالیم داغیلوب دیده تر اولدوم
یاده سالارام جعفریمین حالینه یانام
نالم اوجالار اکبریمین حالینه یانام
هم قاسم و هم اصغریمین حالینه یانام
عمروم نقدر اولسا حسین وای دیرم من
قولاری قلم اوغلوما لای لای دیرم من
بیر گون واریدی عمر اوزونی مفتخریدوم
زینب کیمی نسوان آرا من تاج سریدوم
مجلسده اولان وقتیده اهل نظریدوم
ایندی منیم احوالیمی اما بیلن اولماز
گوز یاشیم آخار اشکیمی یوزدن سیلن اولماز
چارم کسیلوبدور ایشیم آهیله فغاندی
غملر قالانیب قلبیمه قلبیم دولی قاندی
یانمیش ئورگیم تیر غمه گونده نشاندی
دورد اوغلومی چون دست قضا ظلمیلن آلدی
یاندیردی من زاری قرا گونلره سالدی
دنیاده منه جور و جفا و ستم اولدی
یاندی ئورگیم مونسیم عمرومده غم اولدی
غملر قالانیب بیر بیری اوستونده یم اولدی
غرقم یم غمده یانورام غملر الیندن
هی شعله چکوب اودلانورام غملر الیندن
(سالک) یانورام چون شرف الناسیم ئولوبدی
ماتم زدیم قلبیده احساسیم ئولوبدی
قاره گونه من قالمیشام عباسیم ئولوبدی
عمروم قدری باشه قرا باغلیارام من
اوغلانلاریمی ساده سالوب آغلیارام من
- یکشنبه
- 23
- خرداد
- 1400
- ساعت
- 19:22
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه