گلزار کربلاده رضوانی نیلورم من
غیر از حسین جهاندا جانانی نیلورم من
آللاه بیلیر حسینسیز جنت جهنمیم دی
مولا آدی اورکده هریئرده همدمیم دی
دردیم نه اولسا ذکری درمان هرغمیم دی
دردیم حسیندی درده درمانی نیلورم من
سرمایم کربلادی هر دردیمه دوادی
من نوکرم حسینه حسین الحق آقادی
مولاحسین اوزوندن حقی رضا ائدیپدی
تپراقینی قانیلان خاک شفا ائدیپدی
آللاه یولوندا جانین دینه فدا ائدیپدی
جانیم فدا حسینه قربانی نیلورم من
سرمایم کربلادی هردردیمه دوادی
من نوکرم حسینه حسین الحق آقادی
کرب وبلا گوزومده هم مروه هم صفا دی
هم کعبه هم منادی هم عرش کبریا دی
یوخدی اونون نظیری از بسکی با صفادی
کرب وبلا ده اولسام رضوانی نیلورم من
سرمایم کربلادی هر دردیمه دوادی
من نوکرم حسینه حسین الحق آقادی
گوزیاشی گوزده عشقین ایلور جهانه اعلان
عاشق دییر همیشه جانیم حسینه قربان
زینت تاپیپ آدیندان درگاه عرش سبحان
عشق حسینسیز آللاه عرفانی نیلورم من
سرمایم کربلادی هر دردیمه دوادی
من نوکرم حسینه حسین الحق آقادی
مولا حسین قاپوندا من دائمی گدایم
دردیم سنین فراقین مشتاق کربلایم
طوفان گزر باشیمدا چون عشقه مبتلایم
سن اولماسان حسین جان عقبانی نیلورم من
سرمایم کربلادی هر دردیمه دوادی
من نوکرم حسینه حسین الحق آقادی
نوکرلرن غلامم ای نور چشم حیدر
قوما منی قاپیندان جان علی اکبر
ای فاطمه بالاسی دردانة پیمبر
نوکرلیقیندان آیری عنوانی نیلورم من
سرمایم کربلادی هر دردیمه دوادی
من نوکرم حسینه حسین الحق آقادی
قلبیم یاناندا سوز و آهیم منیم حسیندی
هر یدی آسماندا ماهیم منیم حسیندی
هریئرده هرمکاندا شاهیم منیم حسیندی
غیر از حسین جهاندا سلطانی نیلورم من
سرمایم کربلادی هر دردیمه دوادی
من نوکرم حسینه حسین الحق آقادی
من عاشقم حسین جان جان اصغرین فداسی
دردانة پیمبر ای فاطمه بالاسی
اوغلون کیمین گوزل یوخ گلسین منه قاداسی
واردی گینه باشیمدا کرب و بلا هواسی
کرب و بلا دن آرتیق احسانی نیلورم من
- پنج شنبه
- 27
- خرداد
- 1400
- ساعت
- 12:55
- نوشته شده توسط
- یوسف اکبری
- شاعر:
-
سید ناصر ولائی زنجانی
ارسال دیدگاه