حسینه یئرلر آغلار گویلر آغلار
حسینه اهل محشر یکسر آغلار
حسینه آغلیوپدی اوّل آدم
آدین گورجک دوتوپدی قلبینی غم
توکوپدی گوز یاشین گوزدن دمادم
آتا ای وای بالام وای سویلر آغلار
(حسینه یئرلر آغلار گویلر آغلار)
اولوالعزم انبیا اولموش مکّدر
گدیپلر کربلایه زار و مضطر
توکوپلر گوز یاشین اوردا مکّرر
حسینه حضرت پیغمبر آغلار
(حسینه یئرلر آغلار گویلر آغلار)
حسینه آغلیوپ جن و ملک لر
حسین وای سسلنیپ دائم فلک لر
دوتوپ ذّر عالمیندن غم اورک لر
ائده هرکیم بو سّری باور آغلار
(حسینه یئرلر آغلار گویلر آغلار)
حسینه آغلیان چوخ مصطفی دی
رضای حقّه پیغمبر رضادی
شهادت نامه سیلن آشنادی
گلوسین غرق بوسه ائیلر آغلار
(حسینه یئرلر آغلار گویلر آغلار)
بو مظلومون اولا عالم فداسی
ائشیتدی بطنیدن بیکس آناسی
اناالمظلوم اناالعطشان صداسی
حسینه اوّلیندن مادر آغلار
(حسینه یئرلر آغلار گویلر آغلار)
حسینه آغلیوپدی عرش داور
جهاندا اولدی هر غمدن غمی سر
حسینه آغلیوپ عالم سراسر
حسینین ماتمینده حیدر آغلار
(حسینه یئرلر آغلار گویلر آغلار)
سوسوز باشین کسنده شمر کافر
بابام وای سسلنر اطفال مضطر
قاچار شمره ساری غمدیده خواهر
کسیک باش الده قانلی خنجر آغلار
(حسینه یئرلر آغلار گویلر آغلار)
شفاعت ائتماقا زهرای اطهر
الینده ساخلیوپ دخت پیمبر
ابوالفضلین قولون قنداق اصغر
گورنده قانلی کوینک محشر آغلار
(حسینه یئرلر آغلار گویلر آغلار)
حسینه آدم آغلار خاتم آغلار
ولائی نین آلار قلبین غم آغلار
گورر هر یئرده قاره پرچم آغلار
آدین ائیلر دیلینده ازبر آغلار
( حسینه یئرلر آغلار گویلر آغلار)
- پنج شنبه
- 3
- تیر
- 1400
- ساعت
- 11:12
- نوشته شده توسط
- یوسف اکبری
- شاعر:
-
سید ناصر ولائی زنجانی
ارسال دیدگاه