یَابن الحسن ای عالم اَرا شاه دادگر
آهیم یانیقلی سینه دن اِسپهره اوج ائدر
جَدّون وِداعی ذِهنیمه که ایلیر گذر
اوندا بو روضیه یوزه گوزیاشی باغلارام
سن آغلیان وِداعه آقا منده آغلارام
ایداد اودَم که دوشدی خیام ایچره وَلوَله
عَمُّون نه چکدی سن مَدد ائت تا سوزوم گَلَه
بیر کُهنه کوینگی گوروب آلمیش حسین اَلَه
آز قالدی اوندا کاسهءصبری آشوب داشا
زُلفین آلوبدی اَللرینه باخدی قارداشا
گوردی حسینی دورَه لین قزلار آغلیور
شَمسون جمالینه باخور اولدوزلار آغلیور
بیر یاره لی غریبه آدامسیزلار آغلیور
یوز دوندروب مدینیه ساری چَکوب فغان
گَل دادیمه دئدی نَنَه گَل باغریم اولدی قان
یوخدور بیری بو عَرصه ده امداد ائدن منه
گَل گَل چتین گونومدی که ایشلر قالوب سنه
اوغلون گیور بو سن توخیان کوینگی نَنَه
باشدان اَیاقه یاره لیدور قان یره سوزور
قصد ایلیوبدی گِئتمگه بیزدن اَلین اوزور
وقت شهادت اوندا چاتوب شاه مَحشره
اِفطاره چاغریلوب گئدوری خوان داوَره
اَخیام اَرا ولی اَتگی دوشمیش اَللره
زُلفه آتوبدی اَل بیری سَسلردی اَلاَمان
سَسلور بیری دیور بابا رحم ایله بیر دایان
دلبند فاطمه نجه گور توش اولوب غمه
باخدی سینان سپاهینه هم قانلی پَرچمه
حسرتله بیرده سالدی نظر نَهر عَلقمه
یعنی چتین زماندا منیم یاریم هاردادی
گلسون هَرایه قولسوز علمداریم هاردادی
(نادر) قلم فغانه گلوب جوهَر آغلادی
مرجان مثالی سوز دوزولوب دَفتر آغلادی
هم دل بو سوزده آغلادی هم دَلبر آغلادی
اَل چَکمه سن حسین اَتگیندن توسّل ائت
هربزم ماتَمه گئدوسن عاشقانه گئت
- جمعه
- 11
- تیر
- 1400
- ساعت
- 14:42
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه