الله یارادوب جوهر انسانی نمازه
لطف ائتمیش اونا نعمت الوانی نمازه
اشرف ائلدی آدمون اولادینی خالق
بو جنسه وئروب رُتبهء شایانی نمازه
مَامور ائلدی آغلیا تا گویده بلوطلار
آماده ائده گُلشن و بُستانی نمازه
تَکلیف ائلدی بیزلره ارباب نَبُوّت
توراتیله ، اِنجیلیله ، قرآنی نمازه
داغلاربویی وئردی عَظمت مومنه خالق
تا حفظ ائده بو عالم امکانی نمازه
ائتدی بَشرین نَفسینی سَرکش گوره کیمدور
فِدیه ائده بو طینت حیوانی نمازه
ابلیسه غَضبلندی دئدی قادر قَهّار
سن ساخلامادون حُرمت رُجحانی نمازه
ترک ایله بو جَنّاتی خبیث اولدی وجودون
وَقف ایلمیشم روضهء رضوانی نمازه
بیرلحظه عِناده دایانوب گوردی جَزاسین
قوودی قاپیدان عُنصر شیطانی ، نمازه
مَبعوث ائلدی حضرت یاسینی بو معبود
دعوت ائده تا خَلق مسلمانی نمازه
همَّتله توکوب لات و مَناتی یره حیدر
آماده ائدوب کعبهء یزدانی نمازه
چون کوفه ده محرابه یخیلدی شه مردان
باش یاره لنوب آخدی یره قانی نمازه
باخ گور بو نمازون نجه وار شَان فُزونی
اولمادی رضا لطمه یتَه آنی نمازه
اول حالیده اَمر ایلدی اوغلوم حسن ایندی
مسجدده گرک حفظ ائده اَرکانی نمازه
روحیم سنه قربان اولا ای فاتح خیبر
وئردون نَه گوزل جِلوهء نورانی نمازه
اوغلوندا سنون گلدی او گون کرب و بلایه
قربان ائده تیمیش ایکی قربانی نمازه
گودالیده تکبیر دئدی تشنه دوداقلار
اِحیا اولا تا سجدهء طولانی نمازه
تپراقه قویوب یوز مَلکوت اولدولاحیران
تعقیب اوخیور جسمیله هم جانی نمازه
جانانه دئدی من وئررم مین بِله جانی
تا شیعَه لریم ائتمیه عُصیانی نمازه
وئردیم بِله سوداده الهی نَه واریمدور
حَتّی صوداَمر اصغر عطشانی نمازه
(نادر) ئوزووی گوزله بو نفسین خطریندن
دشمندی همین لَذّت نَفسانی نمازه
- جمعه
- 11
- تیر
- 1400
- ساعت
- 17:45
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه