کوی عشقونده الهی باش نَدور پیکر نَدور
سرخوشام بو یاره لردن اوخ نَدور خنجرنَدور
قانلو محرابیمده من چاتدیم وصال یاریمه
اوزگه یاره باخماز عاشق چون بیلور دلبر نَدور
مَسلخ عشقونده دوغراندی نَبی منظر بالام
من سنه مشتاقم الله بیلمورم اکبر نَدور
رَاس نی ده من خوشام باشیم هُوالحَق سسلیه
حَق سوز عنوان ائتمگه مسجد نَدور منبر نَدور
یاندورور گرچه عطش دنیا سویوننان ایچمرم
مست مست جام عشقم بیلمورم کوثر نَدور
خلعت شاهانه دور بو کهنه کوینک اَگنیمه
طالب عَهد اَلسته ، زر نَدور زیور نَدور
مایلم بو کوینگیمله فاطمه گورسون منی
جامهء وَصلتده سُندُس یا که تار زر نَدور
آنلیما بیر داش وروبلار قان آخور رخساریمه
کئچمیشم باشدان اِلهی بیلمورم اَفسر نَدور
قاره تپراقه خوشام آخدوقجا قانیم هو یازا
عاشقانه بیر غَزلده خامه یا دفتر نَدور
سینه می نیزاره اوخشاتسا بو اوخلار عیبی یوخ
ایستی گون ایلر مداوا مَرهم و بستر نَدور
اَمر ایله روح الاَمینه کولگه سین رَد ایله سون
عاشق و معشوق اَراسیندا داها شهپر نَدور
قویدی (نادرده) متاع عمرینی بو درگهه
گرچه شاه کربلایه مین بله نوکر نَدور
- شنبه
- 12
- تیر
- 1400
- ساعت
- 16:47
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه