عُمرین قطاری سرعَتیلن بی صدا گئدور
بیرلحظه یوخ دایانماقی صبح ومَسا گئدور
قویدون اِلیکه عَرصه ی دنیایه سَن قَدم
میندون قطاره بیلموسَن امّا هارا گئدور
انسان مسافر آدلاناجاق تا نَفَس گلور
آخر نَفَسدی مقصد نا آشنا ، گئدور
بیر یردَه سندَه دوشمَلی سن مَنده ای عزیز
امّا هَله بو یولّاری بی اِعتنا گئدور
ناگَه او دونگَه لَر که اوشاقلیقدی رَد اولار
شهر جَوانلیقی نِجه تِز ای خدا گئدور
بَعضیلَرون قطاری قوجا چوللَری گَزور
داغلار نَماسی جِلوه لَنور خوش نَما گئدور
مقصد هایاندی اوردا سَنه کیمدی مُنتظر
خوشدور تَدارکین گورَه هر بینوا گئدور
اَسباب مَنزلی گَل ئوزون یولا مقصده
حَسرتلی گونلَرون سنیلَن ای بَسا گئدور
اوردا دُلاری ، شِمشِ طَلانی ، سایان هانی
نَه مُلک اورا گِئدَر نَه عزیزیم بَنا گئدور
میز رَیاستیله بو عُنوانیده قالار
هر بیر عَمل ولیکن اورا جابجا گئدور
گَل خیر و شَرّی ئوز عَملوندَه قیاس ائله
آذوقَه گور قالور سنه یا که فَنا گئدور
بِئل باغلاما که قِیدووَه اولادیلَر قالا
آسوده دور اوکیمسه که دِینی اَدا گئدور
یارَب قطار عُمریمیزی گوزلَه جایماسین
سَن سَن بیلَن که دوز گئدوری یا خطا گئدور
آخرده توش اولار دَریَه یا وِرار داغا
هَر اول قطار عُمر که بی رَهنما گئدور
خاتم ایکی نشانه قویوبدور هِدایته
هرکس قبول ائدوب اولاری بی بَلا گئدور
قرآنیلن ئوز عِترتینی تاپشوروب بیزه
هر تَک تَکی بو یولدادی بیر مُقتدا گئدور
اَل اوزمَسوک اگر بِله آیدین چراغیدن
روحین قوشی بو مقصده ساری رضا گئدور
(نادر) آماندی آز قالوسان مَقصده اویان
آرام جان تاپار او که چوخ باحیا گئدور
- شنبه
- 12
- تیر
- 1400
- ساعت
- 17:15
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه