علی عالی علی اَعلا علی والی علی والا
وَصیّ سیّد بَطحا ،علی هر مومنه مولا
علی آئینهء داور ، علی داماد پیغمبر
بتول اَطهره همسر،عبادت اهلینه رهبر
اَزلدن تا اَبد خلقه پیمبردن صورا سرور
علی مولَی المُوَحدور اودور آقالره آقا
علی آئین عرفاندور علی مِصداق ایماندور
ولایت جسمینه جاندور،کلامی نَصّ قرآندور
علی سیزعشق بُهتاندور،علی هردَرده درماندور
علینون حُکمینه یکسر باخار دنیا و مافیها
علی پیرطریقتدور،علی روح شریعتدور
غَلط دور وار دئسَم عَدلی علی عین عَدالتدور
اونون افعالی میزان و ترازوی قیامتدور
کَرملَه باخماسا خالق نَه چارَه یَوم وانَفسا
علی عِزّوعلی عِزّت علی علم وعلی حکمت
دیلیم مَدحینده عاجزدور اولوب مُستَغرق حیرت
یارشمازکاهَه تاائتسون بِله بیرکوهیدن مِدحَت
نَه یازسون قطره دریادن قَلَمده یوخدی بو یارا
اگرسیزدَن سئوال اولساعلینون مَنصبی هر گَه
دیون حاشا که هر کیمسه اولا بو سِرّیدن آگَه
اونون میلادینه خالق ائدوبدور بیتی زایشگَه
علی تاخانه زاداولسون حق سبحانه اول اَثنا
اگرچه بوسوزی کامل چکوبدورنظمه چوخ شاعر
گرکدور موریده بزم سلیماندا اولا حاضر
یازولّار کعبیه اولدی آناسی فاطمه زائر
طوافین ضمنی حَملیندن عَلامتلر گوروب گویا
نجه شمعین کنارینده دوشَر آخرده پروانه
اوحالدا توش اولوب دَرده دایاندی بیت یزدانه
قاپی باغلیدی دیواری یاروبدورصاحب خانه
دئدی گَل میهمانیم اول منیم بیتیمدَه ائت مَاوا
همان بیت مُقدّسده صَدفدن آیریلوب گوهر
گوزون یومیشدی دنیایه اومولود نِکومنظر
جمال احمده امّا آچیلدی باغلانان گوزلر
تَلاوت ائتدی قرآنی او اثنا ماهِ دل آرا
علی شَانیندَه کافیدور حدیث لیله الِاسرا
بویوردی حضرت خاتم صَحابه بوسوزی گویا
گجه من طاق چارُمدَه گزوردوم گویلری امّا
ئوزومده حیرته دوشدوم سَماواتی گَزن اَثنا
نه گوردوم بیت مَعموری که وارمین مسجدی پی دَر
که هرمسجده مین طاق زَبَرجَد واردی خوش منظر
وارهر طاقینده یوزمنبر که هرمنبرده بیرحیدر
وئرور اهل سماواته دروس قُرب اَو ادنا
ائشیتدی بوسوزی سلمان نَبیّ حَیّ داوردن
معاذَالله دئدی اولسامنیم شَکّیم بوباوَردن
ولی بیر نُکته مُبهمدورمنه اَلسّاعه حیدردن
گجه بیزده قوناقیدی مَنیدیم بیرده کی مولا
اَباذر چوخ تعجّبله او اثنا باخدی سلمانه
دئدی آنداولسون اول مُنزَل اولان آیات قرآنه
گجه سفره ئوزوم سالدیم ائویمده شاه مردانه
اونون من خدمتیندیدیم گجه نی صُبحه جَک تنها
دانیشدی تک به تک چوخلا بومَضمونی اواَثناده
بلال عَمّاره بوسِرّی دیور میثمده مِقداده
غَرض اَصحابیدن قِرخی اولوب بوسوزده اِستاده
علی اِفطاره بیزدیدی نَدور تکلیفیمیز آیا
اِلیکه باخبر سوزدن بَتول سرفرازاولدی
مُشرّف مَحضَربابَه اوبانوی حجازاولدی
اشاره بیرسوزه ائتدی بوسوزدَه کشف رازاولدی
بیان ائتدی گجه ائودَن عَم اوغلوم چیخمیوب اَصلا
مَزیدحیرت اولمیشدی بوسوز جمله اَحبّایه
اودَم روحُ الاَمین اَندی حضور میر بَطحایه
تَحیّات و سلامیلن بِله عرض ائتدی طاهایه
اَلا یا سیّدالاَبرار،بویوردی رَبّی الاَعلا
گَزن ای قاب قوسینی باشیندا تاج مختاری
یازیلمیش لوحِ مَحفوظَه علینون چوخدی اَسراری
منه مهمانیدی آخشام آچوب سُفرمده افطاری
نماز صبحی عَرشیمده قیلوب اول اَکرم الاَتقا
علی که عرش اَعلانی تَقرّبله گئدوب گَزدی
اگرچه دشمنه حتّی اونون اوصافی مُحرَزدی
سلام ایلردی اَعرابه جواب امّا ائشیتمَزدی
علیدن یوخدی مظلومی گورونمَزگورمیوب دنیا
اَحبا قلبینی(نادر)بونِسگیل حَشره جک داغلار
خلافت اوسته گورکیملَر علینون قولّارین باغلار
باخاندا باغلی قولّاره آدامسیز فاطمه آغلار
قاپی یاندی علی باخدی نَه چاره ایلسون آیا
- شنبه
- 12
- تیر
- 1400
- ساعت
- 19:26
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه