یا فاطمه دوشوب ایشیمیز بابِ حاجته
اَمر ائت عَلم دوتان بالووا ،ماهِ طَلعته
قانلی گوزیله بیر باخا پوزقون جماعته
باب الحوائج آدینون حَقّین اَدا ائده
دردی اولانلارین گِنه دردین دوا ائده
یا فاطمه قَلم گنه ایستور سوزون یازا
قارداش بِلین بوکن یری نَهرین ئوزون یازا
اوخ شعبه سی ئوپن یری ،شهلاگوزون یازا
اوخ شعبه شعبه نیلدی گورسانجیلان گوزه
ظَنّیم دیور اوگون نَظَر اولدی همان گوزه
عَفو ائت خانم بو یرده منی سوز گلوب بِله
شهلا گوزیله اوخ سوزونی آچمورام هَله
مَکشوفه روضه دور ولی نیلوم گلوب دیلَه
واردور یری بو غم ئورگی بی قرار ائده
یوخدور بدنده اَل اوخی گوزدن کنار ائده
باشین اَگوبدی چاره ائده گوز یاراسینه
قویدی اوخون او باشینی دیزلَر آراسینه
فرصت دوشوبدی اوندا ستمگر جفاسینه
آهن عَموده ضَربه سینون لَنگرین قاتوب
سقا یخیلدی ،نَهر فرات اوسته آی باتوب
سوز چاتدی بیر یره که سوزون جوهَرین دیَم
چوخدور اگرچه نسگیلی ،من آخرین دیَم
یان یانه اوخ دوتوبدور اونون پیکرین دیَم
دشمن گوروب یخیلماقینی چَکدی شوروشین
اهل سَما یوموب گوزی سَسلندی یاحسین
واضحدی کیم کمکسیز اولا بیر های آختارار
نسگیلیدور که های ئوزی گلمیش وای آختارار
یاکه دیوم فراته گلوب گون، آی آختارار
تَشبیهین ایندی قوی دیوم آیری نَظیرینی
سلطان اَلی بِلینده گزوردی وَزیرینی
باخدی فراته سَسلدی سَس وِئر هایانداسان
تَکبیرووِین سَسی نَه گلور نَه بَیانداسان
اولما یخیلموسان یِره دریای قانداسان
گورجک سنون قَلم قولووِی سیندی شَهپریم
بیر حاله قالمیشام که چیخوب یاددان اکبریم
یا فاطمه حسینه او دَم گویلرآغلادی
عَمّامه سین آلوب اَله پیغمبر آغلادی
گوردی حسینی قَدّی کمان حیدر آغلادی
امّا بیر آغلیان ائله آغلور داش آغلیور
بیراَل بِلینده قارداشینا قاداش آغلیور
(نادر) مَحرّمین گجه لر سوز وسازی وار
نوحه کلامینون هامیا رَمز و رازی وار
بو بزم ماتمون نِجه گور عشق بازی وار
اهل بُکاء او یرده گلوب آبرو آلار
معناده گوز یاشیلا کَاَنّه وضو آلار
- شنبه
- 12
- تیر
- 1400
- ساعت
- 23:1
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه