اکبر نجه اکبردی معنای وَجاهتدور
خَلّاق هُنروَردن بیرقدرت خِلقتدور
اکبر نجه اکبردی ، زیبا و مُصفّادور
گوزلرنجه گوزلردی شهلا و دلارادور
قاشلارنجه قاشلاردی تیغ خَم دعوادور
صَف صَف دوزولَن کیپریک پیکان مُهیّادور
بَه بَه بو ظَرافتدن مِصداق ظَرافتدور
اکبر نجه اکبردی هم منظر طاهادی
حُسن خَط و خالینده حَق نوری هویدادی
لبلر نجه لبلردی لَعل لَبی حَمرادی
شِکن شِکن زُلفی بَند دلِ لیلادی
هرتاری او زُلفینده بیر بند اسارتدور
اکبر نجه اکبردی زیبَنده و خوش منظر
خَلقینده قویوب مِنَّت اکبر یارادان اکبر
هَم خَلقاً و هَم خُلقاً آئینه ی پیغمبر
بیر هاشمی خال اولمیش کُنج لَبینه زیور
وار چاه زَنخدانی حُسن رُخه بابتدور
اکبر نجه اکبردی محبوب حَق اَعظم
قُرآنداکی تَطهیرین ائتمیش سَنَدین مُحکم
اولماز بو وَجاهتده اولاد بَنی آدم
گویا که مینوب رَف رَف اِسراده گزور خاتَم
قامَت نجه قامَتدی قامَتدی قیامَتدور
اکبر نجه اکبردی حَق جِلوه سی معناده
موسی باخوری طورَه هم اکبره سیناده
گوگدن یِرَه اَنمیشدی نَفسین گورَه عیساده
حِیرتدَه قالوب یوسف بازار زُلیخاده
حُسن رُخ اَراسیندا یوسفده خَجالتدور
گورمیشدی فَلک هاردا بو وَجهی بو سیمانی
حَسرتده قویوب گوزلَر چوللَرده کی جیرانی
قِیقاجی باخیش ایستَر باج آلسون اولان جانی
لیلاده نَه طاقت وار دوزسون بئله هجرانی
اکبرگیونوب خُلعت چون وقت شهادتدور
- یکشنبه
- 13
- تیر
- 1400
- ساعت
- 16:41
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه