رجوع قیلدی درست ایتماقا بساط سفر
تمام یاور سلطان دین صغیر و کبیر
خصوص تازه جوانان هاشمی فطرت
ویرردی جمله سی تخت روانینه زینت
ایشیدیلر اوجالوب طرقوا صداسی گلور
شهنشه نجفین یار مه لقاسی گلور
دیردیلر یول آچون یا معاشر الاحباب
زمین ماریه سقاسینین أناسی گلور
نه گوردولر که یتوب کاروانه ام بنین
یاپوشدی دوتدی علمدار کربلا نین الین
آپاردی محضر پاک امام والایه
دولاندوروب باشینا ایتدی عرض مولایه
فدا اولوم سنه ای کاینات مولاسی
علی اکبره قول ویر میشم بو عباسی
اگر قبول ایلسن ای امام عرش فراش
بو اوغلوم اوغلووا نوکردی من سنه قره واش
بویوردی سرور بطحا ایا ملک منظر
بو قدر ویرمه حسینه بیله خجالتلر
اوزون منه آناسان اوغلون همزبانیمدور
وفالی قارداشیم عباس جسم و جانیمدور
بو سوز تمامه یتوشموشدی گوردیلر یاران
اوجالدی خلق آراسیندا آهیله افغان
ایدوب نظاره خلایق نه کوردولر ناگاه
جناب جعفر طیارین اوغلی عبدلله
گلور یانینجا ایکی نوجوان لاله عذار
دیر فغانیله ای سبط احمد مختار
قوجالموشام من اوزوم یوخدی طاقت سفریم
منیم یریمه عوضدور بو نور دیده لریم
عم اوغلوووندا بولار تحفه محقریدور
ولی ایکی قوزی بیر قوچ فدا برابریدور
زمین کرببلا ایچره ای امام زمان
کرگ ازل اولالار اکبر اوغلووا قربان
سوزین تمام ایدوب اول پیر ناتوان علیل
دوروب کناریده گوز یاشینی ایدردی سبیل
او دمده چونکه بفرموده امام امم
گلوب کجاوه لره اگلشوبدی اهل حرم
حرمسرا قاپوسیندان اوجالدی سس ناگاه
نجیبه زینب بنت علی ولی الله
کنار اولون چکیلون نور حق ضیاسی گلور
حریم لم یزلین بانوی حیاسی گلور
عروس جعفر طیارخواهر حسنین
جلال مخزنینین در پربهاسی گلور
او کیمسه دور بو گلن عورت ای معاشر ناس
أچاندا باشینی گون چخماقا حیاسی گلور
چکیلدی خلق کناره تمام پیر و جوان
جلال و کوکبه فاطمیه اولدی عیان
چخوب حرم قاپوسیندان بعز و ناز و ادب
حسین باجیسی خیر النسا قیزی زینب
کنیز لر دوزولوب هم صولوندا صاقیندا
دوروب نظامیله قارداشلاری قباقینده
ألوب أرایه اونی هاشمیه عورتلر
گیروبله قولتوقنا قاسم و علی اکبر
بو شوکتیله یتن وقته بانوی دو جهان
قباقینه چکیلوب زر نگار تخت روان
باخاندا تخت روانه او بنت اشرف ناس
ویروب ایاقینین ألتینا چکنینی عباس
یاپوشدی قولارینی مکه و حرم شاهی
خطاب قیلدی که ای برج عصمتین ماهی
بویور جلالیله تخت روانه بسم الله
گرک عراقه گیده پیشخانه بسم الله
بویرده خاطریمه دوشدی دشت کرب و بلا
کباب اولوب اورکیم یاندی آه و واویلا
او دم که ماریه دشتینده روز عاشورا
همین بو زینب محنت نصیب بخت قرا
جفائیله قولی باغلی ایکی گوزی گریان
برابرینه چکن دمده ، ناقه عریان
غرض مدینه دن اول زاده ولی الله
اولوب جلای وطن قیلدی عزم بیت الله
فلک زمانیه بیر شور و آه و وا سالدی
عیال فاطمه نین دردی بی دوا قالدی
بس ایت بو قصه نی (قمری) جهانی دوتدی الم
یازاندا شرح مصیبت شراره دوتدی قلم
- سه شنبه
- 9
- شهریور
- 1400
- ساعت
- 11:46
- نوشته شده توسط
- یوسف اکبری
ارسال دیدگاه