دائم رُباب اصغرینه اوخشاما دئدی
اهل وفا وفاده اونا باوفا دئدی
گون مَنزلینده دائمی گهواره تَرپَدوب
گِزلینده اَگلشوب ولی ایوای آقا دئدی
قارداشلاری دالیجا گَلن وقتیده اونون
بو جُمله نی گَلن لَرینه جابجا دئدی
من گَلمَرم سیزیله گِئدون زادگاهوزه
بو قالماقی اَزل گونی خیرالنّسا دئدی
تا وار نَفَس مَحالیدی زینبدن آیریلام
ئولَّم بو ائوده گِئتمرم هِچ بیریانا دئدی
وَقتِ سحرده بیرگونی زینب قیام ائدوب
راز و نیازی باشلادی ذِکر خدا دئدی
صَحنِ سَراده گوردی همان یاتمیان یاتوب
بالینی اوسته گَلدی او کَنزِ حَیا دئدی
وَقت نمازیدور دور اَیا با وفا رباب
غَملی اَذانی مَاذَنه دَه آشنا دئدی
تِکرار ائدوبدی بیرده محَبَّتله بوسوزی
سَس گَلمَدی ، دوباره اَنیس بلا دئدی
ای دَرد و غَمده قَینانیا اوخشیان گَلین
بو یاتماقون حَدیثِ غمی بَرمَلا دئدی
تَرپَد بو گاهواره نی دور اوخشا اصغری
سینوندَه قویما سوزلری گِزلین قالا دئدی
اَمّا رُبابیدن گِنَه ده گَلمیوب جواب
نَه گوزلرین آچوب نَه دانیشدی نَه لا دئدی
باشین دیزاوسته آلدی باخوب غَملی صورته
ناگَه اَل آتدی مَعجَره یا وَیلَنا دئدی
ئولدی رُباب قارَه گِیون قارَه اوستونه
اِیستَکلیمَه گَرکدی دوتام من عَزا دئدی
گوردی رُبابون اَللرینی سینه سیندَه دور
کِلکِ بلا بیر آیری غمی نارَوا دئدی
اَللر کنار اولوب گورونوب قانلی بیر بَلَک
یعنی ئولونجَه صوداَمره وای بالا دئدی
زینب باخوب ائواَهلینه پوزقون تِفاقِینه
چَکدی فَلک منیم اِیشیمی گور هارا دئدی
سیز تَرپَدون بو بوش بِشیگی منده اوخشارام
قویمون عَزاسی فاطمه تَک خوار اولا دئدی
گهواره تَرپَنوب آچیلوب بیردَه زُلفلَر
یوز کربلایه شیرِ زَنِ کربلا دئدی
ای شیرخواره گوزلرون آیدین نَنون گلور
اَمّا ئولونجَه بو سنه لایلای بالا دئدی
اَهل حَرم ائدوبدیلَه سَجّادی با خبر
گَلدی عَزایه بو سوزی اول مُقتَدا دئدی
یاسلی نَنَم ئولونجَه عَزادن چیخانمادی
شمع حَیاتی سوندی بو درده دَوا دئدی
باشین دیز اوسته آلدی بویوردی جوان نَنَه
خَیاط دَهر آق کَفَنونده قَرا دئدی
آسوده قَبره گِئت یولووِی گوزلَر اصغرون
دینجَل مَزاریده یورولوبسان آنا ، دئدی
آز قالدی (نادرا) چیخا دان اولدوزی گِنَه
اِخلاصون اولسا فاطمه صَدمَرحَبا دئدی
- یکشنبه
- 13
- تیر
- 1400
- ساعت
- 22:1
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه