عُذاره خون دلی گوز یاشیم کیمی اَلَرم
خَدنگ آهیم یله قلب عالمی دَلَرم
بو اوخ یِریندن آخان قانه زلفیمی بَلَرم
بالاسی اولانان آهو کیمی اوغول مَلَرم
بو قانلو قُنداقوی گه آچوب گهی بَلَرم
رُبابدن علی بو حالتون آلوب دوزومی
گورن کیمی سنی ایله ایتورموشم اوزومی
گر اولسا سُود اَمری اوخلانان بولر سوزومی
بالاسی اولانان آهو کیمی اوغول مَلَرم
بو قانلو قُنداقوی گه آچوب گهی بَلَرم
قالیدی آغلار آنان چَرخ سُفله چوخ چالشوب
یوزیمده خون جگر دور سر شگیمه قاریشوب
بو اودلی قلبیمی لیلا بُلر نجه آلشوب
بالاسی اولانان آهو کیمی اوغول مَلَرم
بو قانلو قُنداقوی گه آچوب گهی بَلَرم
هامی بُلر علی سن طاقت و قراریم یدون
آنالار ایچره منیم عزّ و اعتباریم یدون
سرور سینَم دون مایهء وقاریمی دون
بالاسی اولانان آهو کیمی اوغول مَلَرم
بو قانلو قُنداقوی گه آچوب گهی بَلَرم
دولوبدی شوقیله دل روز و شب بو نیّتی له
که سوددن اصغریمی بیر آچیدیم عزّتی له
هزار حیف آلشدیم شَرارِ حسرتی له
بالاسی اولانان آهو کیمی اوغول مَلَرم
بو قانلو قُنداقوی گه آچوب گهی بَلَرم
سزادی سن سیز اُلونجه غم آتشی نده یانام
توکم سرشگیمی رُخساره اشگی مه بویانام
دوزر بو مُحنته هانسی آنا که من دایانام
بالاسی اولانان آهو کیمی اوغول مَلَرم
بو قانلو قُنداقوی گه آچوب گهی بَلَرم
مَلول دون اَلیوی باغلادیم که ایتمه تلاش
گذشت ایله بالا من بُلمدیم منِ کُلباش
بو سن بو سینم ایله ایلوسن نقدر خراش
بالاسی اولانان آهو کیمی اوغول مَلَرم
بو قانلو قُنداقوی گه آچوب گهی بَلَرم
دیدیم اگر بالا آز آغلا سینمی داغلا
هاچان دیدیم بیله یات راه چاره می باغلا
سَسون فداسی اولوم گوگلوم ایس توری آغلا
بالاسی اولانان آهو کیمی اوغول مَلَرم
بو قانلو قُنداقوی گه آچوب گهی بَلَرم
بالانون اُنّوگنون رَنگین آق سُوَر آنالار
گوگلده مایل اولور قرمز اُنّوگه بالالار
بیله آلار بالا گوگلین علاج سیز آنالار
بالاسی اولانان آهو کیمی اوغول مَلَرم
بو قانلو قُنداقوی گه آچوب گهی بَلَرم
اوتان ماسام علی بو نعشون اوسته باش آچارام
لوای آهیمی اوج مصیبته ساچارام
ایاق یالین باش آچوخ قوی سالار چوله قاچارام
بالاسی اولانان آهو کیمی اوغول مَلَرم
بو قانلو قُنداقوی گه آچوب گهی بَلَرم
خدنگ ظلم له اوز قانوه بویاندون اوغول
آناندا ظلم اودی نا یاندی سنده یاندون اوغول
آنان مَلَر قالی سن سیز بو سرّی قاندون اوغول
بالاسی اولانان آهو کیمی اوغول مَلَرم
بو قانلو قُنداقوی گه آچوب گهی بَلَرم
بو سُود اَمَر بالا (نجمی) شَهید لر گوزی دور
شهادتین گویونون بیر ایشیقلی اولدوزی دور
بو دلخراش کلامون رُبابین اوز سوزی دور
بالاسی اولانان آهو کیمی اوغول مَلَرم
بو قانلو قُنداقوی گه آچوب گهی بَلَرم
- پنج شنبه
- 18
- شهریور
- 1400
- ساعت
- 18:5
- نوشته شده توسط
- یوسف اکبری
- شاعر:
-
مرحوم نجمی تبریزی
ارسال دیدگاه