بیر مُطرب عَیّار کمال آدلی واریدی
هرشام وسحر مونسی تَنبور وتاریدی
مین شوقیله هرمجلس اَرا تاری چالاردی
خوش صوتیله آواز اوخیاردی زَر آلاردی
آوازینون آوازه سی چون هَر یِرَه دولدی
ارباب حکومتله اونون گئت گَلی اولدی
عیشیله بِله قافله ی عمری سورردی
مِضرابی اونون بَزمیلره شور وئرردی
آثار شَبابین گجه گوندوزلَر آپاردی
ایللَر سووشوبدور او قَرا زُلفی آغاردی
دیشلَر توکولوب یوز قِیریشوب قَدّی بوکولدی
یوخسوللوقونون دَردیده درد اوسته توکولدی
بارماقلار اَسور گوشه اَفشاره دولانمور
ماهوری گزوب شور همایونی چالانمور
نَه سَسده مَلاحَت اونا قالمیشدی نَه یارا
هِئچ بزم سُروره یوخیدی دعوتی اصلا
تار اَلده دوشوب بَرزَن و بازاری گَزردی
دیل یاره سی بیچاره نی هَریِرده اَزردی
قصد ائتدی گِئده بیر گونی دربار اَمیره
ئوز دردینی شاید دیَه سلطانه ، وَزیره
گلدی دَر درباریده تار اَلده دایاندی
یاداِئتدی کئچَن گونلرینی صبری جالاندی
امیدیله دربارین او دَم زَنگینی چالدی
دربان اوجادان سَسلدی آدین خبر آلدی
سَس وئردی کَمالم تاریمون شُهرتی واردی
قصر اهلی منیم صوتیمیله اُلفَتی واردی
بو قصریده من چوخ گجه لَر عمریمی قویدوم
افسوس ولی عیش لباسین بِله سویدوم
گَل آچ قاپونی قویما اولا کونلومی شان شان
سلطانه دیوم دردیمی بَلکه ائده درمان
آچدی قاپونی غیضیله دربان حکومت
تَعلیم آغاجی اَلده وِروب تارینه ضَربت
دورما دئدی تِز گِئت سنه وئردیم بِله هُشدار
حاشا که سنی بیرده قبول ایلیَه دربار
فرمان مولوکانَه دی، ای مَردک جاهل
هر بی هنر اشخاص اِئده بیلمَز اولا داخل
آغلار گوزیلن دوشدی یولا تاری شکسته
بو غمده اولوب اوستَه لیگ اول غملَرین اوسته
گون باتدی گجه گلدی شَفق رنگی قَرالدی
چولدن چوله دوشدی یولی ویرانیه سالدی
بیر گوشه ی ویرانه ده اَگلشدی پریشان
سینه دولی غم ،قلبی سینیق،گوزلری گریان
پاره چاریقا بیرده سینان تارینه باخدی
هی آه شَرر باری چَکوب گوزیاشی آخدی
دیواره قویوبدور یوزونی گَلدی نوایه
تاری بیر اَلینده بیر اَلی قالخوب هوایه
عرض ائتدی بِله ساحَت مَعبوده اوساعت
ای سائله رَحم ایلین ای صاحب عِزَّت
سندنصورا یوخ ایندی منیم حالیمه آگاه
چالّام سنه خاطیر بو گئجه تاریمی آلله
بیر هاتِف غیبی ائله بیل گلدی نِدایَه
سَس قوشدی او دیوار خرابه بو نَوایه
خوش گلموسن ای بنده گِجیلَه منه ساری
عشقیله بو ویرانه ده دور چال گِنه تاری
سینماقی بو تارین سنه قویما اولا نِسگیل
وئردی او سینان تارووُه قیمت بوسِینان دِل
گر اولماسا شهر ایچره سنه ایندی خریدار
قویما اَلووِی قوینووا دور ایستیَه نون وار
حسرت داشین آت ایله او مِضرابوی حاضر
من مشتریم چالماقووا ، چال منه خاطر
بو یرده اِلهی ئورگیم داده گلوبدور
خامه اوخ اولوب مَخزَن آلامی دَلوبدور
ای لطفی کمالون یازیلان بَختینه همراه
رَافَتله سینان تاره بَها بَذل ائدن الله
منده اوخورام مجلس اَرا ای حَقِ مَنّان
نالَم اِئلیَر اهل دِلی بَزمیده نالان
هر کیم غزلی خوشلادی بیر نور دو عِینَه
منده یازارام فاطمه نون اوغلی حُسینه
آتدیم او جوانلیق گوهرین مَقدم یاره
اول یاره کی باشدان اَیاقا پیکری یاره
رَه توشه سی یولدا قوتاران اِبن سَبیلَم
بیر قوملارون اوستونده یاتان شاهه دَخیلم
وئررم سنی یارَب قسم اول شاه حجازه
گودالیده کی سجده یلَن راز و نیازه
عَدلونله یامان گونده بیزی چَکمه حِسابه
عُفو ایله حسین خاطیرینه سالما عذابه
کیم تاپدی حسینون قاپوسین (نادر) اوجالدی
عِزَّت قازانوب کیمسَه بو دَرگَه ده قوجالدی
- یکشنبه
- 13
- تیر
- 1400
- ساعت
- 22:3
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه