فَخر نِسوان جهان بَضعه ی طاهایه سلام
قبری گیزلینده قالان حضرت زهرایه سلام
مامِ سادات آدینا نصب اولا هَریاندا عَلم
مُحترمدور اومکانی بیلَرعشق اهلی حَرم
بَختوردور اورا کیم قویسا خلوصیله قَدم
چونکه روحُ القُدوس اول یرده گلوب نوحَه دیَر
شهپرین اهل عزا مَقدمینه فَرش ائلیَر
اَل اَله وئرمیشدی یخماقا حَقّی زَر و زور
اِزدحام ائتمیشیدی کوچه ده اوچ یوز کَروکور
آنلاری پینه لی امّا هاموسی فاقد نور
تَله سوردی قاپونی سیندیرا عُمّال ستم
قبله ی عشقه هجومین گتوروب اهل صَنم
ثانی غیضیله وروب ضربه او یانمیش قاپیا
شهرت و مَنزلتی عرشه دایانمیش قاپیا
آغلا قان آغلا گوزوم قانه بویانمیش قاپیا
توکولنلَر ائوَه جَهل و جَدلی بوشلامادی
در و دیوار آراسیندا قالانی یوخلامادی
حَق بو طاها گُلونون مِثلینی حاشا یارادا
شانه ی غمله قضا ایسته دی زُلفون دارادا
قاپی دیواره دایاندی ، گُل اوولدی آرادا
باغبان هاردادی گورسون گُلی دوشدی خطره
هم اوولدی گُلی هم گئتدی گُلابی هَدره
چون امامت زِرهین سالدی یرَه وحشی عرب
سیلی زهرایه وِران باشلادی گیزلینده طَرب
مرتضایه بِله کافر نِجه ساخلاردی ادب
فرصت اولدی او یَدُالله اَلینی باغلیالار
دورد بالا هم آنیا هم آتیا آغلیالار
بِله بیر ظُلمه هیچ اَدواریده یازموبلا نَظیر
سالدیلار بوینونا دستاری او عمال شَریر
عجبا روبَه و کَفتاره اسیر اولدی او شیر
سَریلوبدور یره گوردی گُل طاها سارالور
آپارولار ئوزون امّا ئورگی یردَه قالور
فاطمه آچدی گوزون فِضیه بیر ائتدی نَظر
عُمریمون شمعی دئدی گرچه بو دردیله سونَر
گودرَم ئوز بالامی قبریده من شام و سحر
مهدی اوغلوم که گَلر آستاناما سایه سالار
ذولفقاریله او گون مُحسنیمون قانین آلار
نَه بیلوردوم بیزه بو شهریده دشمن چوخوموش
باخیشی حیدریمون دشمنه گویا اوخوموش
دئمه بو یثرب اَرا بیزدَن آدامسیز یوخوموش
جمع مَظلومیده من حیدری باشدا سانورام
گوزونون یاشین اودور دردیمه درمان تانورام
یاعلی ای شرف اَرض و سَما ، میرِ اُمم
رحمت و جودووی دَرج ائتمگه عاجزدی قَلم
هاردادور حاتم طایی آلا تا درس کَرم
گجه کئچمیش یاریدان(نادرون) احوالینَه باخ
معرفت نورینی مولا بو یانان سینیَه شاخ
- سه شنبه
- 15
- تیر
- 1400
- ساعت
- 21:52
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه