منی نازونله ای جانان گتوردون جانه نیلوم بس
ایله بیر درده سالدون حسرتم درمانه نیلوم بس
جهان اهلی طبیب اولسا تاپولماز دردیمه چاره
سنق نی تک اولور گور گلمیم افغانه نیلوم بس
بوتون عشّاق آفاقه بو دردی ایتسلر قسمت
دیه لّر تک تکی اولدوم خدا دیوانه نیلوم بس
ایدورسن وصلوه نایل غمیم دلدن اولور زایل
گیدنده یاندورورسان قلبیمی هجرانه نیلوم بس
منی عشقون چوله سالدی ایدوبدور بی سر و سامان
گورور هر کس گولور من بی سر و سامانه نیلوم بس
فراقون سنگی سندیردی بو قلبیم شیشه سین دلبر
یخوب صبریم ایوین ایتدی عجب ویراانه نیلوم بس
زمانه باشمی قاتدی چخاتدی هر زادی یاددان
آیردی یاریدن لعنت گله دورانه نیلوم بس
نگارین دردی بیر یانه وجودیم دردی بیر یانه
او درده یا بو درده یتمور ال درمانه نیلوم بس
شماتتلر ایشتدیم چوخ بُلنَّن بُلمین لردن
طعامیم شربتیم زهر اولدی گلدیم جانه نیلوم بس
درخت عشقیمه هر گون سرشکیله سو ویردیم من
جوانه ویرمدی، اشکیم دونوب عمانه نیلوم بس
دایان یعقوبی چوخ ایتمه گلایه قانمیان قانماز
دیمه قلبیم یانوب تشبیه اولوب بریانه نیلوم بس
- جمعه
- 1
- مرداد
- 1400
- ساعت
- 20:54
- نوشته شده توسط
- یوسف اکبری
- شاعر:
-
حاج حسن یعقوبی تبریزی
ارسال دیدگاه