دوندرن باغ مصطفانی دانش هر زمان نوبهاره فاطمه جان
گل خوش بوی حضرت طاها توش اولان نیش خاره فاطمه جان
چخورام دیشره گوزلریم ساتاشور پشت درده او قانلی مسماره
سینوه باتماقی یاخلماقی سینوین قانی درب و دیواره
یاره سی بیر یارا اولوب هرگز اولماز اولسون او یاریه چاره
غسلوی من ویرنده دگدی گوزه
سینوین اوسته یاره فاطمه جان
قان ویروردی همان یارا گوردوم
خود به خود یومدوم هر ایکی گوزومی
حاضر و ناظریدی اسماده گوردی ایله ایتیردیم اوز اوزومی
قالدیم ایله بی چاره زهرا جان ایلیه بیلمدیم ادا سوزومی
پوزقون حالون گوروب پوزولدوم من
آخدی اشکیم عذاره فاطمه جان
گیجه لر اوج ایدن سماواته مرتضا دود آهدور زهرا
منه مونس مزارون اوستونده بیر فقط نور ماهدور زهرا
آستانم اولوب زیارتگاه محسنون قتلگاهدور زهرا
قویموشام اوردا اوز الیمله سنون غنچه وی من مزاره فاطمه جان
کسمه سین من کیمی گوروم بو فلک هیچ کسین یر یوزونده چاره سینی
در و دیواره گوزلریم ساتاشور آرتورور قلبیمین شراره سینی
آناواویرموسن نشان دی گوروم سینوین قان ویرن او یاره سینی
باخسا سینه وه قولداکی یاراوا غم یتر شهریاره فاطمه جان
ای مه برج مرتضی نه سبب اولدی گون باتدی سنده تیز باتدون
نوریدن سالموسان ستاره لرون صبح و شام فرقتونده آغلاتدون
گوردون آتدی علینی اهل وطن سن ندن بس عم اوغلوی آتدون
سسلورم ویرموسن جواب، گینه
سسلورم من دوباره فاطمه جان
انسانین شادلقی و یا محنی آشکار اولار ایکی گوزدن
دانشار آهی چکسه آه اوسته غمی معلوم اولار همان سوزدن
یوموسان گوزلرون عم اوغلووی سالمیسان گوزیاشی کیمی گوزدن
گوزوی یوماقون ووروب یاره یارامین اوسته یاره فاطمه جان
گونده اوچ دفعه هر فریضمده عرض قیلام خدای منّانه
منی بو حالته سالان شخصی باغری من تک دولا قیزیل قانه
بالالاریم کیمی بالاسی قالا آناسیز عمر ایده یانایانه
آتش غصّه دن علی مثلی دوتا قلبی شراره فاطمه جان
بیر حسن اوغلوین غمی زهرا اوجا داغدان آغیر اولوبدی منه
دیموری کوچه ده نلر اولدی
نقدر ظلم اولوبدی سنه
چکوری مخفی آهی آه اوسته زلفی بنزر خزانده چمنه
نقدر من سوال ایدیم اوغول ایتمسین بیراشاره فاطمه جان
گیجه گوندوز توکور سرشکینی ابر باران مثالی رخساره
دیموری ثانی ستم پیشه نجه ایتدی قبالمی پاره
غسلودا قالموشام نه احواله گورموشم بیر قولاقیوی یاره
ددیم الله سنوب دوشوب قالدی هارادا بس گوشواره فاطمه جان
محنت و تهمت و شماتتلر روح یعقوبونی ایدوب خسته
دردینه چاره تاپموری ناچار چکوری پیدر آهی آه اوسته
نوکریمدی براتین امضالیوم گله تیز تیز مزاریمون اوسته
صدقیله دردینی بیزه دیوری گل ایداخ بیزده چاره فاطمه جان
- جمعه
- 1
- مرداد
- 1400
- ساعت
- 21:3
- نوشته شده توسط
- یوسف اکبری
- شاعر:
-
حاج حسن یعقوبی تبریزی
ارسال دیدگاه