دفن ایلدی بقیع ده علی اوز نگارینی
بیر آه چکدی قویدی مزاره عذارینی
سسلندی یات دعاوی خدا ایتدی مستجاب
.یومدون گوزون چووردون علی روزگارینی
دینجل گیلن ایویمده منیم دینجلمدین
.ترک ایلدون سن ایندیکی محنت دیارینی
یخدون عم اوغلووون ایوینی ایلدون خراب
.سالدون بو قلب زاریمه هجران شرارینی
دوندردون اولماقونلا علینون دونرگه سین
دور گور مزارین اوسته غم آشکارینی
ایندی غمونده قلب ایوینی داغلیان منم
.عرشه یترمیشم اورگیم آه و زارینی
قربان اولوم او قلبه کی گیزلیندی غملری
.عالم رقم وورا بوله بولمز شمارینی
نی تک سزلدرام نیه بس ویرمیسن جواب
.الدن ویروب و یا کی علی اعتبارینی
.آخر نه گلدی دلده کی مهر و محبته
.دیندیر من فلک زده نی غم دچارینی
ترک ایلیوب مزاریون اوستن گیدنمورم
.هجرون آلوبدی دیزلریمون اختیارینی
الله بولورکه قبره قویاندا نه چکمیشم
.آچدوم مزارون ایچر ه گوزوم آبشارینی
آغلار گوزوم ساتاشدی ایکی آشنا اله
.گوردوم گورور امانتینون شرمسارینی
.خجلت تری قارشدی گوزوم یاشینه منیم
.چکدیم بیرآنیده هامی دنیا فشارینی
سالدی گره گشایه غریبه گره فلک
.یغمایه چکدی ظلمیله دار و ندارینی
بولمم بو یرده مسکن ایدوم یا دوروم گیدوم
.من بی کسین چکور بالالار انتظارینی
زینب نواسی یدی فلکدن کچوب یقین
هجران آلوبدی دلدن حسینون قرارینی
.الان تیکوبله گوز یولا اطفال ناگران
.غم لشگری آلوب بالالارون کنارینی
گیدسم یولوم او سن دویولن کوچه دن دوشر
.بیر کوچه کی خزان ایدوب عمرون بهارینی
عمروم بویی بو نیسگیلیوه آغلارام سنون
.یاد ایلرم یامان گونومون غمگسارینی
(ساده) یتیشمیسن عجب عالی سعادته
سایمده دالدالان ، ایله سن افتخارینی
- جمعه
- 1
- مرداد
- 1400
- ساعت
- 21:15
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه