قوملار اوستونی بستر ایلمه
خوش دگور سنه بو مکان اوغول
گون اذیت ایلور یارالیسان
یاتما قان ایچینده اویان اوغول
بیر شکسته نی تک سیزلدورام
باشین اوسته ای مه لقا سنه
سمعیوه یتیشمور مگر سسیم
یا کی ناز ایدیرسن اوغول منه
خیمه ده حرم ناگرانیدور
یاتما دور گیداخ دارالایمنه
گون ایوینده گل مسکن ایلمه
آلما دلدن آرتوق توان اوغول
نطقه گل منیله دانش بیر آز
جان عالم اولسون فدا سنه
آز زمانیده یوز ویروب نه چوخ
دشت کربلاده بلا سنه
منجنیق غم قلبیمی سیخور
گوزلریم دوشنده بالا سنه
سلب ایدور اورکدن قراریمی
لبلرونده بو لخته قان اوغول
حالیوه نه تنها منم یانان
اود دوتوب دل آل حیدری
جان ویرن او قوش تک خیامیده
چرپنور غمونده اورکلری
لیلی حزین بولموری هله
قانینه باتوبدور دلاوری
گوز تیکوب باخورخیمه گاهیدن
تلین اوستونه ناگران اوغول
هر آنا بالانون مصیبتین
گورسه گوزلری ابر تک دولار
یا اَشدّ اولاندا مصیبتی
قلبی اودلانار زلفینی یولار
نیسگیلون سنون بیکرانیدور
عاقبت آنان غصّه مرگ اولار
یوخ آنا کیمین روزگاریده
اوغلونا اورکدن یانان اوغول
دلده گر چه مقصوده چاتموسان
مسکن ایلیوبسن کی بو یری
لیلینون گوزوندن اوزاق اولا
غصه دن اگر اولسه واریری
درک ایله اونون حالینی بیر آز
دور دوتوم قولوندان اوزون یری
خیمه گاهه جاخ بولمسین هله
قانیوه باتوبسان جوان اوغول
صبحدن غم بیشماریله
من بو دشتیده سینه داغلورام
گه گلوب یارالی آپارموشام
گه خیامیده یاره باغلورام
باشدا یاره وی باغلیانمورام
یاره آغلیور قان من آغلورام
یاره یاره اوستن وروبدی بس
ظلمیله سنه شامیان اوغول
هرغمی که انصاره یوز ویروب
جان کیمی اونی جانه آلموشام
سسلیوب ویا دادینه منی
باشی اوستونه سایه سالموشام
عالمین غمی یوز ویروب سنه
نعشین اوسته اواره قالموشام
دردیمی آچوب داغلارا دیسم
داغلار ایلر آتش فشان اوغول
- جمعه
- 1
- مرداد
- 1400
- ساعت
- 21:16
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه