او اوخ آتان که سنی قانیله خضاب ایلیوب
اوخون آتاندا ، منیم قلبیمی کباب ایلیوب
دگنده اوخ ، اورکیم بولدی خیمه ده ، گوردوم
قزشدی قلبیمی اود دوتدی التهاب ایلیوب
او اوخ یخوب ایویمی روزگاریمی چووروب
سنی اگر چه فرات اوسته کامیاب ایلیوب
او گون گون اورتا چاقندان ورم ایدوب اورکیم
کرخدروبدی غمون فکریمی خراب ایلیوب
او اوخ نجه اوخوموش بولمورم ، دیولّه ولی
همان اوخون تایی سقّانی دلکباب ایلیوب
سالوب خیالیمه هر آن همان اوخی دئمیشم
نه خاطره سنه ده اوچ پر انتخاب ایلیوب
یتیشمیشم بویره فکریمی اولوب راحت
مقام عشقده چون قهرمان حساب ایلیوب
گه آغلورام سنه گاهی باخوب فرحلنیرم
یوزونده نور خدا گور نه بازتاب ایلیوب
او قان دولان گوزیوه گوزلریم اولا قربان
دوباره قانلی باشون نی ده انقلاب ایلیوب
صبا آلور گوزل عطرون مشامیمه یتیرور
خمار و نشئه، منی عطر و بوی ناب ایلیوب
مشامیمه یتیشن عطریوه اوزوم قربان
او اوچ پر اوخ گولومی ایله بیر گلاب ایلیوب
اوجاتموسان باشیمی عرشه سن ایوین آباد
منی شهید آناسی هر گورن خطاب ایلیوب
ولی ئورکده منیم نچّه نیسکیلیم واردور
خدا بولور که نجه روحیمه عذاب ایلیوب
بیری بودور کی سو اوستونده باغلادوم اَلیوی
آنان خیال ایلیردی اوغول ثواب ایلیوب
ولی دیولّه او اوخ سانجلاندا حنجریوه
الی که قونداقا باغلیدی پیچ و تاب ایلیوب
اودم سودوم یوخودی ناعلاج قالمیشدوم
دیمه آنام اَلیمی بسته طناب ایلیوب
گلوبدی سینمه سوت ایندی منّتون چکیرم
سالوبدی جانیمه اود، قلبیمی کباب ایلیوب
وریدیلر او باشی سینم اوسته ساخلاردوم
هزار حیف اولا که دشمنیم جواب ایلیوب
نّئیون یوخوندی سنون (ساده) دار فانی ده
بو بس کی اصغر آدی دیده وی پرآب ایلیوب
- یکشنبه
- 3
- مرداد
- 1400
- ساعت
- 11:3
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه