آغلاما توکمه گوزون یاشینی دامانه قیزیم
گل اوتور زلفوه بیر اللی ویروم شانه قیزیم
گوگلوم ایستور گینه بو حالیله رافت ایلیم
دیندیروب گوگلون آلام من سنه خدمت ایلیم
روزگاریندن آچوب صحبتی . صحبت ایلیم
روزگاری که گتیردی منیده جانه قیزیم
عمروون هر دمی هر چند کی محنتدی سنه
صبر ایله غملره مندن بو وصیتدی سنه
اقتضا ایلین عالمده مشیتدی سنه
یتر عمرون باشا گوز یاشلی یانا یانه قیزیم
دگورم راضی گورم گوزلریوین آغلاماسین
آغلاما، آغلاماقون قلبیمی تا داغلاماسین
آتاوین باخ گیلن اورگش گوزومی باغلاماسین
گلمه چوخ بلبل شیدا کیمی افغانه قیزیم
چوخ جفالر اُلی گلزار ولاده علنی
ایلیر اهل جفا ظلمیله مسموم حسنی
چاغیرار گوزلرینی باغلاماقا اوندا سنی
یتشرسن او زمان سنده بو عنوانه قیزیم
بس کی آرتوق اولاجاخ زهر جفانین اثری
حسنین دوغراناجاخدورستمیله جگری
سسلسه کاش اولا اوندا آناموندا خبری
عوضیمدن آنالیق ایله اونالانه قیزیم
سانا گلمز آناوین دلده اولان دغدغه سی
روزگارین هله وار سنله بیوک مسئله سی
سینه وی داغلیاجاخ کرببلا واقعه سی
صبر ایله باخ هله بو گردش دورانه قیزیم
ددیقوم واقعه دن نچه علامت ویریرم
بیرده بو پیرهنی من کی امانت ویریرم
قارداشون ایسدسه سندن بیر اشارت ویریرم
وراسان بوسه اودم هنجر عطشانه قیزیم
ایسدسه کوینکی هنگام غم و فرقت اولار
ولی دیداریزه مقتلده گینه فرصت اولار
چوخ چتین ساعتین عالمده همان ساعت اولار
کشمکشده بلشر اللرون القانه قیزیم
کربلاده سنه از بس که غم ایجاد اولاجاخ
غصه و غمدن ایشون ناله و فریاد اولاجاخ
نو عروسین طویونون صحبتی برباد اولاجاخ
باتاجاخ اللری ظلمیله او گون قانه قیزیم
لیلی حسرتده قالار ماه لقا اکبرینه
غصه دن پرده گلر نچه زمان گوزلرینه
دئسه زینب الیمی ویر بالامون اللرینه
آچ عبانی . الینی ویر او پریشانه قیزیم
حرمله دشت بلاده نچه اوخ کی آتاجاخ
قلبیوی هر اوخی آتدوقجا یانوب اودلاناجاخ
لیک بیر اوخدا ربابین دلونه اود سالاجاخ
یاناجاخ حالینه حتی دل بیگانه قیزیم
قوی دیوم کرب وبلادن سوراکی گونلرینی
آرتیرار نازلی رقیه اورگین غملرینی
باغلاسان شامیده آغلار گوزیله گوزلرینی
مهربان قلبین اولار غملره غمخانه قیزیم
بالامون گوشه ویرانه ده قبرین قازاسان
دفن ایدوب نیسگیلینه اود دوتاسان اودلاناسان
باش داشندا اوز آدوندان سورا اکبر یازاسان
نیسگیلی اود سالاجاخ عالم امکانه قیزیم
- یکشنبه
- 3
- مرداد
- 1400
- ساعت
- 11:8
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه