هانی عم اوغلی او باش که اولا مصیبت سیز
هانی او دل که جهاندا قالوبدی محنت سیز
هانی او درد و بلا که تاپوبدی بیر باشی
اولا عواقبی دار فناده حکمت سیز
یقین حکمتی واردور که باغلانا قولوی
جسارت ایلیه اوچ یوز نفر عدالت سیز؟
گونون گون اُورتا چاقیندا اُوز آستانینده
دُویوله محرمیوی گوز ایوینده علت سیز
نه چون دفاع ایلیوردی او دم ولایتدن
جهانی فاطمه نینور اولا ولایت سیز
سنون ولایتیوه یا علی اوزوم قربان
نه قدری اُلمه میشم قویمارام حمایت سیز
سیزون رضایتوز الله رضاسیدور یوخسا
بهشتی گورمیجاج کیمسه بو رضایت سیز
اودور که هر غمی من جانه آلمشام بلکه
سیزون رضایتوزی جلب ایدم نهایت سیز
سیزون محبتوز هر دلده اولسا روز جزا
اولار جهنم اودوندان یقین قسمت سیز
فدا اولوم اورکینده اولان محبتیوه
بو دوقوز ایلده بیر آن اولمادون محبت سیز
محبتین اورکیمده یر ایلیوب اوزینه
محبتی که همیشه اولوبدی منت سیز
سیزون محبتیزون سایه سینده دالدالانور
تمام خلق جهان چون همای رحمت سیز
سیزون وجودیزیلن عالمی تاپوپدی صفا
فدا اولوم سیزه سیز آبروی خلقت سیز
خدایه حمد ایلرم دائما نماز اوسته
جهانی قویمادی قالسین ولی نعمت سیز
امامیم حاضر و ناظر اولوب کناریمده
وصیت ایلیورم اُلمیم وصیت سیز
وصیتیم سالاجاخ زحمت فراوانه
بَغیشله َسیز بولورم معدن سخاوت سیز
ویرنده غسلومی لطف ایت آیرما کوینکیمی
دگور بو جسم نحیفیم که چون جراحت سیز
گوزون ساتاشسا منیم سینه ده اولان یاراما
بو داغلی قلبیوی ایلر دوباره طاقت سیز
سیز آغلاساز منه ، قان آغلیار یارالارمی
او دم او حالوزه ای شاه دین ، قناعت سیز
عنایت ایله وصی اول منیم وصیتیمه
اقلّی روحیم اولا قبریده اذیت سیز
گیجه زمانی منی دفن ایله ولی گیزلین
سقیفه اهلی دگور چون بیزه عداوت سیز
منیم بالالارمی ساخلا گوزلرون اوسته
خصوص حسینیمه اولما بیرآن عنایت سیز
سنون عنایتون الحق خدا عنایتیدور
یتر قیامته جاخ عالمه ملامت سیز
یانان چادردا قیزیم زینبین هراینه گل
بلا چولونده او دم که قالوبدی نصرت سیز
بیر عمردور منه نوحه یازار یانار ((ساده))
امیدواریدی که اولمیا شفاعت سیز
- یکشنبه
- 3
- مرداد
- 1400
- ساعت
- 11:12
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه