گل گل هایاندا قالموسان ای پور بو تراب
هجران اودیله قویما اولا قلبیمیز کباب
گوز تیکمیشوخ گلن یولوا مین امیدیله
امّیدیمیز عنایت ایله اولمیا سراب
آخر ندن نهاندی یوزون پشت ابریده
انصافیدور مگر آرامیزدا قالا حجاب
رد ایت حجابی ای گل گلزار مصطفی
جانلار فدا مگر ندن ایلورسن اجتناب
لطف ایله چشم جان سالا عکس عذاریوی
عاشقلره او هدیه اولا یادگار ناب
قاب ایلیه او عکسی وورار خانه دله
داغ فراقون ایتمیه تا قلب ایوین مذاب
شوره گله بو نوعیله عاشقلری تمام
بیربیرلرین گورنده بئله ایلیه خطاب
آز قالدی که بهار اولا چوخدا دارخمیون
یارین گلن یولوندا، اکین گُل، سپون گلاب
یا صاحب الزمان گورسن بیر ایله گونی
عاشقلره هاچان اولاجاخ حقدن انتخاب
الله بولور که آیریلقندان نه چکمیشوخ
روحاً چکور محبّلرین جمله سی عذاب
هر چند چوخ فضیلتی وار انتظار اولاق
اما سیزون فراقیزه وار هانسی دلده تاب
قربان اولاخ گلن یولوا هاردا قالموسان
گل لطف قیل ظهوریده ایله بیر آز شتاب
بیر عمردور که گول آدوی سسلروخ مدام
دلدن بو نوعیله ایدروخ رفع اضطراب
آیا ندن بو سسلره بیر سس یتورموسن
سالما سکوتیویله دل عالمه شهاب
تعجیل ایله اماندی جهان ظلمیله دولور
شرحی یازیلسا، دوتمیا ممکندی مین کتاب
سنسیز چتین ایشقلانا بو تیره روزگار
پرده دالندا قالما عیان اول ای آفتاب
ظلمت سرای دللره سال نور ذاتیوی
ای نور حق ندن یوزیوه دوتموسان نقاب
حقدن ظهوریوه گر اوزون ایتمسن دعا
اولماز دعای خلق جهان جمله مستجاب
بیر چاره قیل بو اُمّته ای فاطمه گُلی
ائتمه بیزیم دعالرین اوستونده چوخ حساب
فانی جهاندا غرق گناه اولمشوخ نه چون
اعمالیمیز ایدوبدی اورک ملکونی خراب
دریای غمده غرق اولوروخ هاردا قالموسان
اهریمن آز قالور اولا دنیاده کامیاب
عطرون هاچان مشامیلره گوندرر صبا
ایلر خمار و نشئه آچلسا اگر او باب
ای ((ساده)) دوتمیونجا بشر حق دامنین
حقدن چتیندی صادر اولا حکم انقلاب
- یکشنبه
- 3
- مرداد
- 1400
- ساعت
- 11:32
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه