جان تاپشوراندا شیر خدا شاه ممتحن
چوخ زحمتیله آچدی گوزون سویلدی حسن
دردیم ندور اورکده اونی آشنا بولر
فاش ایلسم اگر داغا آتش فشان ایدر
ایتام کوفه دوشدی گینه یادیمه منیم
جلوه لنور گوزومده، وورور قلبیمه شرر
فکریم قالوب بو یرده که ایتام کوفه ده
مندن صورا او گورمه دقی گونلری گورر
سونسه اگر چه بو گیجه عمروم چراغنی
اوچ یوز ایوین چراغی او دم شهریده سونر
تا سونمیونجه گل اوجادان شیون ایلمه
نی تک سیزلداما اولا ایتام با خبر
ناله سسون یتشسه، یتیمین قولاقینه
الله بولور یتیم لره ایلییَر نلر
ایندی بالالارون آنالار رام ایدوب هله
بولسه یتیمیلر اُلورم صف چکر گلر
هر چند که سحر گلجاخ نالیه تمام
ایندی نوایه گلسله باخ گور منه نئدر
مندن صورا یتیمیلره باش چکون اوزوز
قلبین سوندورون که خدا اجرینی ویرر
گورسن گلوب نوایه اگر بیر یتیمه نی
آل گوگلونی سووندور اونی اولماسین ملر
دوندی عجب زمانیده دور زمانه نی
دونسه دونرگه ساخلاماق اولماز اونی، دونر
بیرده اگر چه قاتلیمه ایله سز قصاص
بیر ضربه ور که ضربته ضربت کفاف ایلر
اعضاسینون تمامینه لطمه یتیشمسین
آرتوق قصاصیدن ایدورم من سیزی حذر
اجرا ایدنده حکمی غضبلنمیون اونا
هر چند، ایدوب جهانی گوزومده منیم کدر
مندنده چوخ سنون باشیوین وار مصیبتی
گوزیاش عذاریوه اَلَمه اولما خونجگر
سن آغلادوقجا سس چکیر آغلور حسینمی
زینب گلور نوایه ایدنده اونا نظر
عباسه باخ نه حاله قالوب گور او با وفا
گویا سپهر غمده خسوفه دوشوب قمر
ای (ساده) ساده نظمه چکیلدی بو غم سوزی
نیسکیلیدور ولیک اورکی اوخ کیمین دلر
- یکشنبه
- 3
- مرداد
- 1400
- ساعت
- 11:34
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه