قویاندا فاطمه نی قبره ساقی کوثر
گوروندی شیر خداونده دست پیغمبر
سرشکی عارض پر نمده، دلده شعله آه
کمال حُزنیله عرض ائتدی یا رسول الله
بو سن بو فاطمه آل مندن ای شه خوبان
که اُولمدی اُوزی اُولدوری فرقه عدوان
مکدّر ایلدی مرآت حق نمانی عدو
کانّهُ که مکدر اولوب بو گون قران
فدا اولوم سنه آهسته آل بو پیکری که
قویوب بقیع محبتده حیدری گریان
مشیت ازلی باغلادی علی قولونی
ائدردی یوخسا جهان عناصری ویران
وئرنده غسلونی الله بولور نه چکدیم من
یاراسی کوینکین اوستن اوزین وئروردی نشان
نچه کفن عوض ائتدیم دوباره قان اولدی
مصیبتین اثریندن اولوبدی باغریم قان
غریبه وقتیده گلدون هرایمه یِتدون
یتیردون ال منه ای ابروی کون و مکان
یتیرمسیدون اگر ال منه بو دمده اوزون
مزاره تاپشیرا بولمزدی مرتضی آسان
منه جهاندا سنون چوخ یتوبدی احسانون
فدا اولوم سنه اِئتدون گینه بویوک احسان
گلنده محشره قویما قویا اَلین بِلینه
و گر نه شعله قهریه دن یانار ارکان
یتوبدی گوش دل مرتضایه صوت جلی
مشیت ازلیدن بودور امور نهان
گلنده محشره دخت رسول عم اوغلی علی
تمام، انفس اولار شوقیدن او دم خندان
گلنده محشره زهرا الینده پیراهن
او پیرهنله ائدر اهل عشقی شادُروان
او گونده شور سالار محشره قلم قوللار
او شوره جمله خلایق اوگون قالار حیران
او دم که قوزیاجاخ فاطمه اَلین عرشه
حزین حزین دیه جاخ یا عزیز ، یا سبحان
بغیشله امتی یارب بو محسنه خاطر
پیمبر امتینین ایله دردینه درمان
او دمده فاطمه نین قدرینی بولر امت
یاراندی فاطمیه خاطر عالم امکان
بو یرده یادیمه دوشدی دیار کرب و بلا
خطور خاطر اولور حال اصغر عطشان
امانته ایلیوبلر خیانت اهل کَفر
پر آچدی اهل ستم دن سه شعبه بیر پیکان
علی اصغره دگدی رباب دیسکیندی
آنا نوایله سسلندی اصغریم جان جان
خدا بولور که نه حاله رباب او دم قالدی
رقیه نی آلوب آغوشینه دیلینده فغان
بویوردی وای منه قالدون رقیه قارداشسیز
بو چولده قُلزم ذخار غم ائدوب طغیان
رقیه آغلادی سیلدی آناسنون گوزینی
ادبله عرض ایلدی آغلاما سنه قربان
منای عشقیده اصغرجهاده جان وئردی
تاپوپدی اصغریله زیب سینه سلطان
زیارت ایلماقا زمرّه ملائک اَنیر
که ظل شهپریله سایه دار اولوب میدان
اولوبدی عرش معلایه قانی پیرایه
اگر چه لرزیه گلمیش مکَوّنِ کیهان
بابام قوجاقی اولار گاهواره اصغریوه
((عتیقه ده)) بو فیوضاتیدن یتَر احسان
پیاله دل ((شبگیر)) قانیله دولودی
اودور که خامه سی اولموش الینده خون افشان
- یکشنبه
- 3
- مرداد
- 1400
- ساعت
- 11:58
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه