قبر زهرایه علی دائم اورکده تاب و تب
یول سالاردی ناله ایلردی ولیکن نصف شب
سَسلنردی بو منم نالان فرقت فاطمه
قلبیمی اِیلوب اِحاطَه درد و محنت فاطمه
گوگلوم اِیستیر روز و شب بو یرده سینه داغلیام
روز روشن قسمت اولمور بو سعادت فاطمه
مرتضانی آیری بیر احواله سالدی فرقتون
تنگ اولوب سنسیز منه دنیای ظلمت فاطمه
آچ گوزون دور قبریدن باخ گور نه حاله قالموشام
بی سبب آخمور عذاره اشک حسرت فاطمه
ای منیم اِیستکلی دلداریم نه خوابه گِتمیسن
نطقه گل درد و غمیندن اِیله صحبت فاطمه
درد اَلیندن دینجَلوبسن قبریده یایوخ هله؟
من کیمی دردون و یا اِیلوبدی شدت فاطمه
اولمادی بیر دم گورم آسوده خاطر اولموسان !
درد و غمدن قبریده اولدون نه راحت فاطمه
احمد مختارین اشکی مَرهَم اولدی یاره وه
من که اشکیله اِیدنمزدیم طبابت فاطمه
آغللادوقجا یاره لر قان آغلاداردی حیدری
خشگ بند اولموردی سیننده جراحت فاطمه
دردیوه چوخ سعی قیلدیم تاپمادیم اما دوا
بو مصیبتده نهاندور هانسی حکمت فاطمه
لازمیمیش غم غم اوستوندن قالانسین قلبیوه
قالسین آغلار حاکم عدل و عدالت فاطمه
من دعا اِیتدیم نصیب اولسون شهادت اولمادی
سن دعا ایتدون ولی اولدی اجابت فاطمه
تک نه سن چاتدون اورکده مقصد و مقصودیوه
قسمت اولدی محسنه فیض شهادت فاطمه
سسلدون تا پشت درده فیضّه نی امدادیوه
نچّه یول اولدوم دیریلدیم من او ساعت فاطمه
کشمکشده همتون حاشا که خاطردن چیخا
کیم بولر اِیتدون منه آیا نه نصرت فاطمه
کوچه ده ای کاش اولیدیم منده، اما اولمادیم
اقتضا اِولدی منه اوندا مشیت فاطمه
نصف شب غسلون ویرنده سرّون اولدی برملا
قاتلون گوردوم ایدوب اوزگه جسارت فاطمه
آیری بیر احواله قالدوم تا گوزوم گوردی یوزون
جانیمی آز قالدی آلسین بو عبارت فاطمه
ناگهان گوردوم حسن آچدی او کوچه صحبتین
گورسنوب گویا قیامتدن علامت فاطمه
مجتبانین قلبی غمدن اِیله اِیلوبدور وَرم
عاقبت دلدن سالار بو درد و محنت فاطمه
کاش حسینه اولمییدی ظلم ثانی برملا
کربلاسینده اونون وار چوخ مصیبت فاطمه
بیر اِیله احواله قالمیشدی بالالارون او دم
گِتمیشیدی اللریندن صبر و طاقت فاطمه
باغرینا باسمشدی کلثومی او دمده زینبون
واردی بیر دنیا بویی اوندا لیاقت فاطمه
همتین تنها اویرده اِیتمیوبدور بر ملا
اِیلدی شام غریبانونده همت فاطمه
بیر ایله شام غریبان حشره تک اولماز اولا
آیری بیر عالم یارانمشدی او ساعت فاطمه
سس ویروردی زینب و کلثومه اول دمده حسین
قلبینی آلموشدی درد بی نهایت فاطمه
گوز یاشین گوزدن روان ایتدی عذاره صبحه تک
اشک چشمیندن بیر آن اِیتموب قناعت فاطمه
گر چه هیچ کیم گلمدی شام غریبانه اودم
ماتمه ویردی حسینون آیری زینت فاطمه
نوحه یاز بو ماتم عظماده آغلا ای (عتیق)
دستگیرون تا اولا روز قیامت، فاطمه
- یکشنبه
- 3
- مرداد
- 1400
- ساعت
- 15:25
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه