پناه او شاهه که، اهل جهان عیان آپارور ؟
اوزی اوز اهلینی آیا هارا نهان آپارور ؟
نه خاطره گورَسَن ترک اِیدور بو ماوانی ؟
سفر ایدور هارا آیا بو لیل ظلمانی ؟
ندن گلوب یولا سالمولا شاه بطحانی ؟
یقین آغیر سفر اِیلور که کاروان آپارور ؟
اگر حجازه مشَرفدی بو گیجه یاری
نَدندی چَکمدی چاووش شهریده جاری
گَلوب مُحبلری بدرقه اِیده باری
بیر آیری مقصده شه اهلینی گمان آپارور
نظاره ایلوری محمللره امام زمان
خصوص اومحمله که زینب اِیلیوبدی مکان
یقین ایستوری زینبدن اولمیا نگران
ایدوب او محمله عباسی پاسبان آپارور
غریبه قافله دور یوخ جهاندا همتاسی
هزار جان گرامه دَیر تک عباسی
اولوبدی همره حسینیله اول گل یاسی
اوگول که حسرتین هر باغ و باغبان آپارور
کجاوه لر باشا باش نسترن دی وسوسن دی
یغوبدی گولرینی گوئیا که خرمن دی
غریبه گوللری وار چوخ صفالی گلشندی
او گلشنین گولونون شرحی چوخ بیان آپارور
او گوللرین بیری که چوخ گوزلدی گوللردن
غریبه ارث آپاروب حضرت پیمبردن
اماندی حفظ ایله یارب نَظرلی گوزللردن
سالوبدی آردیجا بیر نچه دلستان آپارور
پیمبرین نه گوزل گولَنوب، خدا چمنی
بیریسی یاسیدی اول گوللرین ، بیری سمنی
او گوللرین بیری یاده سالور امام حسنی
گوزلیقی او گولون قلبیدن توان آپارور
رباب کام آلوری شیر خواره اصغردن
گهی اوزوندن اوپور ایگلیور گه حنجردن
اُزولمییدی دِیور کاش اَلیم بو اللردن
باسوبدی باغرینا محملده ناگران آپارور
- یکشنبه
- 3
- مرداد
- 1400
- ساعت
- 15:36
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه