من راضیم خدا اولا سندن رضا اوغول
گِیت قانه بات بو سن بودا قانلی منا اوغول
اعمال حَج قالدی به ظاهر که نا تمام
قربانگهه آپارمادی قربان او گون امام
قربانلارین گتیردی بو صحرایه لا کلام
عهد ایلمیشدی عهدینه ایلور وفا اوغول
هرچند که بو درد و غمون یاندورار منی
چوخ زحمتیله بسلمیشم من نه چون سنی
ترک ایلسن اگر ایله بو دارالایمنی
قُوی اقتضا بو دشتیده اِیتسون قضا اوغول
اون سَگیز ایل که دوزدی آنان هر مشقته
تنها بو گوندن اوتری، یِتورسون بو ساعته
گیت دینیوین یولوندا یِتیش سن شهادته
گوز یاشیمه منیم اِیلمه اعتنا اوغول
گلزار دینیده اولان ای نخل با ثمر
آخر منی بو آیریلقون غصه مرگ اِیدر
گَتدون ولی بو دمده منه چوخ گوزل خبر
تاپدی اورک بو خوش خبرونله صفا اوغول
ای افسر سپاه خداوند بی نیاز
اگلش یره دوروم دولانوم باشیوه بیرآز
ایتدون قدومیویله من زاری سرفراز
الله اوزی جزاسینی اِِیلر عطا اوغول
من واقفم بو نیتیوه دلده مو به مو
قانیله ایستیسن آلاسان سن بو گون وضو
مدتدی که شهادتی ایلردون آرزو
دلده بو حُسن نیته جانیم فدا اوغول
بیر نکته وار که اِیلیوری قلبیمی کباب
بیر نکته دور بو نکتیه روحیم چَکور عذاب
سو ایستَسَن یوخومدی یقیناً سنه جواب
دردیم یاماندی ایله منی بیر دعا اوغول
رخصت جهاده ایندی که سن آلمیسان علی
اولسون سودوم حلال سنه شرطی وار ولی
آهسته آت قَدم بو اورک بلکه دینجلی
آلسان بو مطلبی اِیلیر اکتفا اوغول
یوخ سوز که سن بو عهدیمیزه اِیلَسَن وفا
چوخدا یوبانما خیمه ده ای معدن سخا
تل اوسته گوزلیور یولوی شاه کربلا
گیت قوی کفن بیچه بویوا، مه لقا اوغول
نوحه اِیدنده عارضه گوزیاش اَلر (عتیق)
صدق و صداقتی اِیلیبدور بیزه صدیق
غفار بحر رحمتینه ایلسون غریق
ذکری جزاده اولمیا یاویلنا اوغول
- یکشنبه
- 3
- مرداد
- 1400
- ساعت
- 15:55
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه