گینه ده نیمه ی شعباندی مبارکدی بو گون
جشن میلاد وصیّ فتبارکدی بو گون
آقانین نور جمالی یایلیب ئولکه میزه
چپ باخانمز بیری دیواره دوشن کولگه میزه
اهل ایران چوخی اثنی عشری مسلکدی
اودی قرآنله عترت بیزه مایملکدی
اونادا حکم خدا ختم رُسُل مدرکدی
کیم بو ارکان تشیّعده اوزین لا بیلسه
ردّ اولار هر عملی حجّت سبحان گلسه
صاحب عصرکی دائم بیز اونا مفتخروک
روز میلادی هر ایل شهر و دیاری بزروک
گینه بیر جمعه ظهور ایلیجک با خبروک
گوزوموز یولدا قولاق سسده اودور جمعه لری
گزروک حضرتین عشقیله هامی تکیه لری
اودی خورشیده وئرن نور فروزان قمر
اونا خاطر وئرر اشجار گنه کاره ثمر
اونا خاطر گل آچار دشت و بیابان گورر
اونون عشقیله عناصر بیزه نور افشاندی
اونا خاطر نعم باری بیزه احساندی
آقانون لیل ولادت هر ایل ایلوبله رقم
مقدمیندن چوخالور آب طهور زمزم
مؤمنینه آچور آلله او گئجه باب کرم
شب رحمتدی مسلمانه شب زیبادی
یازیلور نار سقردن هامیا آزادی
وار خبر حضرت باقر و آقا صادقدن
چوخ فضیلت او گئجه اهلینه وار خالقدن
بیر منادا بئله سسلور فلق صادقدن
نقدر اولسا حسینون بو گئجه زوّاری
هاموسین عفو ائلدی حضرته خاطر باری
محترمدی نقدر گور بو حسین آللّهه
منتسب ایلدی آلله اونی ثار آللّهه
هم عزیز ایلدی کلّیه ی خلق آللّهه
او عزیز هامی خلق آللّهه جانیم قربان
جان نه ارزش واردی روح روانیم قربان
حجّت بن الحسن عسگری باباسی حسن
آناسی نرجس خاتونیدی رومیّه وطن
خواستگار اولدی اونا فاطمه رؤیاده علن
تاپدی توفیق سعادت بو خانم رؤیاده
کسب ایمان پیمبر علی و اولاده
اوصیاء خاتمی سمّی محمّد صلوات
یازیلا نامه ی اعمالیمزه قوی حسنات
وئرر آلله بیزه ده بو مه احساندا برات
چارده نور و بو ایّامی اوزی رحمتدن
بیزه خاطر قویوب آلله قوتاراق زحمتدن
کیمدی مهدی عجّل الله تعالی و شریف
چون ظهور ایلدی اولماز اونا مانند و حریف
سلفی _ داعش و تکفیری نقدر اولسا ردیف
دول کفر تماماً یغیشا بیر طرفه
هاموسین منهدم ایلر آقامیز بیر هدفه
زره جعفر طیّار آقانون تن پوشی
باشدا دستار پیمبر علوی سر دوشی
ذوالفقار الده مسلمانه آچیق آغوشی
اوچ یوز اون اوچ فدوی لشکر عزّت جاهی
جمله توحیدی مسلمان هامی حزب اللهی
گئجه گوندوز یره رحمت یاغاجاق گولردن
بهره مند اولسون هامی لطف مه انوردن
کاش بیزده یتیشک کامه او دوز رهبردن
ای خدا رحم ائله دنیاده مسلمان قلیل
قویما وهّابی الینده اولا اسلامی ذلیل
گرچه شعبان آیی ماه شعف و شادیدی
دوز حسینی لره اوتدان مه آزادیدی
آخرت ملکینه خوش فرصت آبادیدی
الده وار یاخچی بهانه بیر آز اولسون شادلیق
کربلا شاهینه آغلا آلاغون بایراملیق
بیر حسین کی اونی آللّهدا چوخ ایستر هامیدان
یا حسین سسله گوزون یاشینی قیل سنده روان
بلکه آلله بیزیده عفو ائده بو عید گران
عمر نوح ایلیه سن گر بو جهان فانیدی
فکر عقبی ائله دائم سنه بارانیدی
گور نه طرزیله حسین دین محکیندن کچدی
دگدی بیر اوخ اورگیندن کورگیندن کچدی
اورگین یاردی پی و لحم و رگیندن کچدی
دئدی آلله نه وئریبسن هامی قرباندی سنه
سنده محشر گونی عفو ایله عزاداری منه
قطعه قطعه بولونوب اکبر و عباس جوان
قالمیوبدی اوزینون صاف یری مقتلده عیان
قان ایچینده چوبالور زینب ائدور آه و فغان
گینه اول حالده قیزلارینا فکر ایلمیور
هی رضایم بقضا اوز اوزینه ذکر ائلیور
اوخ گلور نیزه گلور تیغه ی شمشیر گلور
یوخ دفاع ایلمگه حالی گینه تیر گلور
ذوالفقاری دوشوب الدن گوزه دلگیر گلور
قورخوسیندان قاچان اشرار گلوبلر یوخینا
باش کسنلر آلیب اطرافینی یاز آغلا «صفا»
یوخ وفا عمره نه دنیایه نه مال و حشمه
قالیب ایش محشر کبرا حق صاحب کرمه
وئره جک عفو عمومی بیزه زهرایه گوره
شیعه نی اوغلی حسین هاویه دن قورتاراجاق
نار دوزخده فقط دشمن زهرا یاناجاق
- یکشنبه
- 3
- مرداد
- 1400
- ساعت
- 17:39
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه