مژده اولسون هامی احبابه بو روحانی خبر
روز فرخنده دی مسروردی دل هم دلبر
ماه احساندی مه صوم و صلاة و برکات
نخل ایمان گتریب باره بو آی چوخ گُللر
رحمت ابرین ائلیوب شیعه لره ارزانی
خوان احسانین آچیب صاحب احسان داور
نچه گل گلشن ایجاده گلیب سویملیدی
هره سی بیر جوره دنیایه وئریبدور زیور
عرشیان رشک آپارور منزلت دنیایه
زمزمه غبطه ائدور چشمۀ آب کوثر
دمبدم تیره تُراب اوسته گلور فوج ملک
بی خبردی ولی هر کیمسه کی یوخ نور بصر
گونده بیر نور وئرور مطلع انوار هُدا
بعضی لر شمس هدایتدی یا آی یا اختر
دل بیدارده هر تک تکینون رفعتی وار
کنز خلقتده اولاردی بلی ارزنده گُهر
ایندی عنواندی بو گون شعریمه بیر ریحانه
شامدن مرقدی نُه طاق ثریانی بزر
کیم بویوک مشکله دوشسه بو فنا دنیاده
تز بو خردا بالانون خوان عطاسینی گزر
آدی مشهور رقیه شه بطحا بالاسی
روز میلادیدی عشّاق اونا تبریک دییَر
نور باراندی حسینون ائوی یاران بو گجه
شادماندی ننه سی فاطمه ی نیک سیَر
با وفا گلنی خانم فاطمه نون یعنی رباب
بیر خانم قیز گتیریب عالمه زیبا منظر
نجه بیر قیزدی باخان حظّ ائلیور صورتینه
گوزلری قاره لبی لعل، رُخی قُرص قمر
شوق دیدارینه ایلور عجله حورالر
زلف زر تارینه بال و پر آچیب نیلوفر
آلیب آغوشینه علیا ملکه اُمّاسی
فخر ائدور مقدم نوزادینه شیدا مادر
دیندیرور نازیله هر دم گُل طنّازین آنا
غنچه لبلردن ئوپوب حمد ائلیور شام و سحر
دیور اللّه بو قیزون داغینی چکمه سینمه
لوح تقدیر یازیبدی اونا بیلموردی نَلَر
اوچ یاشیندان دوشه جک چوللره مهجور وطن
کربلا آدلو مکاندا اولاجاق زار و مَلَر
سو کنارینده سوسوز ذبح اولاجاق باباسی
نیش خاره توخانار ظلمیله ریحانۀ تر
صید اولار بیر گونی صیاد الینه آهوتک
خاک و خون ایچره سالار یاره لی جیران بستر
آت قباقینده بو مظلومه نی دشمن قووالار
یخیلیب شاهی گورر مقتله باشسیز پیکر
بویانار قانینه قارداشلاری عباس عموسی
ایاقین خار مغیلان یارالار داشلار ئوپَر
ضرب شلّاق کبود ایلیه جک گُل بدنین
قمچیلر آلتدا گلیب نالیه افغان ایلر
قولی باغلی دوشه جک فرقۀ اشرار الینه
آج، سوسوز پای پیاده یوزینه اشکین اَلَر
شامه عریان دوه ده کرب و بلادن گئده جک
ناقه دن یولدا دوشوب واهمه دن جسمی اَسَر
عمّه سین سسلسه تز سیلی جوابین وئره جک
عمری کوتاهدی اما گوره جک چوخلی خطر
کُنج ویرانه ده آخر گئده جک قبر ائوینه
آغ تاپیلماز کفنی قاره ائدر قبره سفر
یا رقیه سنه بیر عدّه گلیب جشن دوتا
صله وئر مزد «صفا» وار یری اولسون بهتر
- یکشنبه
- 3
- مرداد
- 1400
- ساعت
- 17:46
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه