نیمه ی ماه مبارکدی مه صوم و صلات
نازل ایلوب یره حق منبع فیض و برکات
سنه ی سوّم هجرتده بلی جمعه گونی
ذات حقدن آچیلوب کُلّ مشاکل دوگونی
بوریوب عطر جنان یثرب و بطحا گوگونی
بیت زهرایه سمادن توکولور نقل و نبات
یری وار پایلانا بو بزمده شادلیق نوغولی
گلدی دنیایه بو گون فاطمه نون ایلک اوغولی
آنا کی فاطمه اولدی بله اوغلان دوغولی
گُل جمالینی گورن سویلیه دیلدن صلوات
نه اوغول گل یوزی مرآت حق لم یزلی
کیم باخوب سویلدی به به بودی یثرب گوزلی
بخته ور فاطمه نون باشینه شاد اولسون علی
بو گوزلیکده اوغول عالمه گلسون هیهات
ویردیلر حضرت پیغمبر چون بو خبری
سونوب کاسه ی چشمینده دولوب اشکتری
آلدی آغوشه چکیب باغرینا نور بصری
ئوپدی گل صورتینی ئیلدی جدّی دفعات
گلدی جبریل امین قرب رسول اللّهه
امر امر ازلیدور دیدی ظِلّ اللّهه
یازیلوب لوحه حسن آد بو خلیل اللّهه
چکور حسرت لب لعلیندن اوپه آب حیات
صاق قولاقینه اذان سویلدی اوّلده نبی
صول قولاقینه اقامه اوخیوب زیر لبی
آدوی قویدوم حسن سسلدی کنز ادبی
آغلیوب فاطمه نون قلبینه سالدی شبهات
نه نه سی سویلدی بابا سوزی روشن ده منه
آغلیورسان ندور علّت گوروم اوغلوم حسنه
هامی مسروریدی یوز ویردی ندن غصّه سنه
بو معمّانی منه کشف ایله ای نیک صفات
متصوّر ایله سن دیلده بو غم منظره سین
نه بیانیله او طفلون دیله دوتسون نه نه سین
جعده نین ظلمینی زهرایه دیسون یا دیمه سون
متحیّردی بو احوالده میر عرصات
نه نه دی ایلکیدی بیر اوغلی اولوب آی پاراسی
سونوردی ولی ناراحت ایدوبدور آتاسی
آتا بو جشنی دوزنمور پوزا یانسون بالاسی
ایستموردی نه نیه کشف اولا باریک نکات
گوردی آرامشی سلب اولدی قیزی فاطمه نون
ناگزیر آچدی او دَم قفلینی گنج محنون
آغلورام من دیدی بو علّته بیر گون حسنون
جگری پارچالانار زهریله هنگام ممات
گورنور ایندی همان لحظه همان گون گوزومه
اود دوتوب سینه یانور دیلده کی گیزلین سوزومه
اختیاری دگول اشکیم اولی جاری یوزومه
بو مصیباتیده کیم آغلاسا واردور حسنات
آلار اطرافینی گوز یاشلی پریشان باجیلار
بالامون نعشینون اوسته قره تلّر آچیلار
باشلانار آغلاما دل ناله لری عرشه چیخار
حشره جن بو بالامون ساخلار عزاسین هیئات
نه گوزل یاس دوتولوب یوم وفاتی حسنه
احترامیله اولوب غسل و کفن گل بدنه
بیر شهیدونده دونوب جسمی عقیق یمنه
غرقیدی قانه یخیلمیشدی قتیل الابرات
گلدی قارداشنی زینبده تاپوب جان اوسته
گوردی قاتل الی شمشیرده خسران اوسته
بیر حزین سسده گلور دم بدم افغان اوسته
هی دیور وای بالا ای وای آتاسیز قالدی بنات
یخیلیب گودی مقتلده حسین قان آپاریب
خوان فردوسه ئوزیلن نچه مهمان آپاریب
هاموسین تشنه قزل قانینه غلطان آپاریب
نیه بس دونمدی قانه او گون اعدایه فرات
- یکشنبه
- 3
- مرداد
- 1400
- ساعت
- 22:47
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه