دور ای بلا و مصیبت لر آشناسی باجی
گوز آچ اویان باشیوون باشلانوب بلاسی باجی
حیاتِ شمعی خموش اُولدی قارداشون حسنین
سولوبدی گلشنِ عمری گئدوب صفاسی باجی
ویروبله زَهرِ جَفا قان دوروب دوداقیم دَه
نجه یانور دئمورم سینمون یاراسی باجی
شَهادتیم باجی بو زَهری له یقین اُولدی
هزار شکر که دینین وار اِعتلاسی باجی
دایانما دور باجی جان اهلِ بیتی ایله خبر
دئ قارداشون حسنین وار نه اِبتلاسی باجی
همیشه اهلِ وِلانین بلایه اُلفتی وار
بلاسی وار بلی وار هر کیمون وِلاسی باجی
بو کُوزه دَن بو سودان ایچ موشم یانور جگریم
محال دور اُولا بو دردی مون دواسی باجی
هانی آتام هانی جَدّیم هانی آنام زَهرا
فنادی هر کسه اُولماز جهان بَقاسی باجی
اگر بلائیله تخمیر اُولوبدی زینب آدی
عجب دِگل بو آدین واردی چوخ بلاسی باجی
ایاقه دور باجی وِئر حالیمی حسینه خبر
گلوب گوره حسنین وار نه ماجراسی باجی
دئ قاسمیم گله بیر گُول یُوزون دویون جا گورم
فراهم اُولدی منه آخرت اساسی باجی
بو سخت وقتی دَه چوخ خوشدی اُوغلوم عَبداله
گله کناری مه اُول گُوزلریم ضیاسی باجی
دیَم که کیمدی ابُوالفضله قاتلیم هیهات
صلاح دور منه بو مَطلبین خفاسی باجی
بو سرّی قبره آپارّام ولی جهاندا اُونون
گوزینده تار اُولاجاق عالمین فضاسی باجی
جهاندا باغریمی قان ائتدی لر مُنافق لر
چون آشنالری مون اُولمادی وفاسی باجی
نه قدر ویردیله زحمت دؤزوب دایاندیم من
اولوب او صبر و تحمّل دَه حق رضاسی باجی
او کور دل که گوزی کوری دَی بصیرتی تک
یوخیدی عاطفه سی اُولمادی حَیاسی باجی
اَیاقیمی ائله ایتدی عَصائیله مَجروح
هنوز وار اثرِ زخمِ نارواسی باجی
جهان منی ائله مَظلومِ روزگار ایلدی
بو امّتین منه سَلب اُولدی اِعتناسی باجی
نه بیر حیاتیم ئولن دَن صُورا جهاندا منه
اُولار نه ناله سی نه بیر کسین نَواسی باجی
علاوه نعشیمی اُوخلار بنی اُمیّه، چخار
سپهره عترتِ اطهارین آه و واسی باجی
بو آستانه قویوب یوز اُمیدی له (خوندل)
گر اولسا خدمتینون ارزش و بَهاسی باجی
حضورِ حضرتِ موسی الرّضاده بو اَثری
یازاندا خامۀ نا چیز و نارساسی باجی
دیردی قبریوه قربان اُولوم عنایت اِیله
هامی مَریض لرین سیزده وار شَفاسی باجی
- چهارشنبه
- 31
- شهریور
- 1400
- ساعت
- 17:13
- نوشته شده توسط
- یوسف اکبری
- شاعر:
-
حاج حیدر خوندل
ارسال دیدگاه