صبحدی اون دوقوز ماه صیام
حیدر کرّار امام همام
قصد نمازیله ائدیبدور قیام
عازم اولوب مسجده شاه انام
انجم و افلاک فروزان قمر
ایلور اشاره اولاجاقدان خبر
یر دانشور حیدریلن مستمر
وار نه خبر ای شه والا گُهر
عرشده وار حادث خونین پیام
قبله نما گلدی دوروب قبلیه
صبح نمازینی ادا ایلیه
باشلادی تکبیر اذان سویلیه
صبح وصاله تلسور نیلیه
واقف اسراردی چونکه امام
کعبه ده دنیایه گلن محتشم
حیدر کرّار امیر اُمم
سجدیه قدّین ائلدی تیز خم
اندی دالیجا دم تیغ ستم
وای دئدی جنّاتیده خیر الانام
سسلدی جبریل به صوت جلی
عرشده یا شیعتی قُتل العلی
سوندی هزار حیف اولا دین مشعلی
غرقدی اوز قانینه نعم الولی
قالدی نمازی آقانون ناتمام
یوز گوزی قانلی یخلیب مرتضی
باش بولونوب قان سوزولور تپراقا
چوخ سوزی وار ایلیه بیلمور ادا
رنگی سولوب گاه باخور صاق صولا
فُزتُ بربّی دیور آرام رام
اوغلی حسن صاحب قلب سلیم
امر ائلدی حاضر ائدوبلر گلیم
چون دئدی مولا آپارون دینجلیم
ائوده داخی صحّته چاتماز الیم
دای ایکی گوندن سیزه چوخ قالمارام
وای بابا آغلور سولیور مجتبی
شاه شهیدان دیور ایوای بابا
ناله و افغانه گلیب نُه سما
گیدی ملائک قره قوردی عزا
حیدره نالاندی تمام نظام
سس یتشیب زینب غم پروره
تز یتریبدی اوزین اول سروره
قان سوزولور گوردی علیدن یره
دل دئدی آیا نه گلیب دلبره
کیم بوییوب قانوه ای ذوالکرام
کیم بابا بو حاله سالیبدور سنی
قویدی ئولونجه داخی آغلار منی
سولدی الهی بابامون گلشنی
گل آنا ای مهر و وفا معدنی
حامیدون سن باباما صبح و شام
غبطه ائدردیم بابا اجلالوه
ایندی نجه آغلامیوم حالوه
من نجه طاقت گتریم نالوه
قانه بویانمیش بو خد و خالوه
زینبه مشکلدی گتیرسون دوام
حیدر ائشتدی قیزینون سوزلرین
ایلدی جاری یوزه اشک ترین
ائتدی مخاطب نگران دخترین
گت باباون حاضر ائله بسترین
خوشدی قوناقه ائده سوز احترام
دای منه فکر ایلمیون زینبیم
قوی دیوم السّاعه بیلون زینبیم
فکر تدارک ائلیون زینبیم
ئولملیم من سولیون زینبیم
اولسون حسن واقف نصّ کلام
نایبه ی زهره ی زهرا قیزیم
آغلاما چوخ ایلمه غوغا قیزیم
صبر ایله ای غملری دریا قیزیم
ایله عزا حیدره برپا قیزیم
عمری علینون بالا اولدی تمام
سنده دوشر بوردا بلایه باشون
ناقه ده سن نیده گزر قارداشون
کوفه ده قانه دولانار گوز یاشون
خیل اسیراندی او گون یولداشون
عترت زهراده اسیر ظلام
وار حسنونده باشینون چوخ غمی
زهر وئرر اوغلوما اوز محرمی
داغلار اونون غصه سی بیر عالمی
قارداشوون سنسن او گون همدمی
ایندیدن آماده اول ای خوش مرام
اوغلوم حسینونده قضایاسی وار
چوخ باشینون دهر ده غوغاسی وار
غربت آرا درد غم افزاسی وار
تشنه وئره جان حقه امضاسی وار
واقف اول ای دختر والامقام
کرب و بلا آدلو مکاندا حسین
دینه وئرر یتمیش ایکی نور عین
تک قالار آخرده شهِ مشرقین
سسلر هایاندا شهدای حُنین
اوردا دیرسن کی حسین من وارام
ماه مبارکدی لیال دعا
اولدی مصمّم نظریم بی ریا
شعر یازام در محن مرتضی
یازدی بو اشعاری علیجان "صفا"
لطف ائله مزدیم اولا شیرین کلام
- دوشنبه
- 4
- مرداد
- 1400
- ساعت
- 11:28
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه