مژده ای شیعه بو گون روضه ی رضوان بزنیب
خاکی عالم گُل آچیب مثل گلستان بزنیب
خوشیدی شیعه هامی جامه ی زیبا گینک
علی و فاطمیه عرض ارادت ائلیک
بو ایکی نوره گرک بو گونی تبریک دیَک
چون بو گون فاطمه مثل گل و ریحان بزنیب
مرتضی شیعه سی اولماز بئله بیر گونده عبوس
شب دامادی مولادی اوتورما مأیوس
بزنیب اُمّ ابیها بو گجه اولدی عروس
بو گوزل جشنه هامی عالم امکان بزنیب
سالگرد شب دامادی حیدردی بیلون
غصّه گردین دل صافوزده اگر واردی سیلون
آچ الون ملتمس اولسون در مولایه دیلون
سائله گل نجه گور خانه ی احسان بزنیب
بزنیب فاطمه حورا گوزی حیراندی اونا
سائلی بوش یولا سالماز هامی قرباندی اونا
قوی دیوم دردون اگر اولسا نه درماندی اونا
فاطمه گیزلین اولان دردلره درمان بزنیب
هاتف غیب دمادم ائلیور مؤمنه فاش
مرتضی عاشقی اؤزگه قاپیا گئتمیه حاش
پایلانور بو گجه هر کیمسه گله جشنه شاباش
خازن جنّت آچیب سفره ی غفران بزنیب
نرگس و نسترن و سنبل و یاس و سوسن
مریم و لاله شقایق دولیدی دشت و دمن
عطر افشاندی ریاحین سراپا گلشن
دامن سبز طبیعت بئله شایان بزنیب
شمع و پروانه طربناکدی خندان گورّم
طلعت روی گلستانی دو چندان گورّم
شوریله بلبل شیدانی غزلخوان گورّم
عرش و فرش و فلک و جنّت و ایوان بزنیب
هامی شاداندی سرافرازیدی زهرا آتاسی
حیف اولا یوخدی جوارینده عروسون آناسی
آناسیز اولسا گلین طویدا خوش اولماز بالاسی
هر قدر گورسه طویوندا هامی مهمان بزنیب
یری وار فاطمه طویدا اؤرگی قان اولسون
آناسین یاد سالیب گوزلری گریان اولسون
نار غمده دل مهجوری پریشان اولسون
نور ایمانیله هر چند او دل و جان بزنیب
گه باخور دورینه گوز آلتی دیور کان حیا
قیزوون جشنیدی گل طویدا یرون بوشدی آنا
نسگل اولدی منه سنسیز اورگیم دوندی قانه
بیلمورم طویدی و یا کلبه ی احزان بزنیب
باخورام گه گل زیبای رُخ همسریمه
او بهانیله تسلّی وئرورم غملریمه
ولی اودلی اورگیم آخ دیور اشک تریمه
شبنم اشکیله گل چهره نمایان بزنیب
گر چه غملیدی عروس علوی لیل زفاف
بیلمیوردی هله وار دشمن دینیله مصاف
در و دیوار آراسیندا یخیلار کنز عفاف
گوره جک صحن علی قانیله الوان بزنیب
باب رحمت اولاجاق آتش سوزانه هدف
باغلانار خیبر آچان اللّری وار جای اسف
چکیلر مسجده بوینوندا رَسَن شاه نجف
بیعت آلسونلا گورر جبریله میدان بزنیب
سقط اولار محسنی بطنینده گلر فریاده
یوخ دیور بیر کسیم اللّه یتیش امداده
شرمیدن سسلمز ئوز همسری گلسون داده
چون حیا کانی خانم، اُسوه ی ایمان بزنیب
قول قابورقاسی یارا ثانی ویرار بیر سیلی
یخیلار منظر اغیارده صورت نیلی
ئوز ائوین گونده گرک ترک ائلیه تحمیلی
لوح تقدیرده بو مشی پریشان بزنیب
دورد معطّر گُلی هر گون دولانار چوللّرده
یارالی عین جوانلیقدا دوشر بسترده
ترک ائدر همسر و اطفالینی اشک ترده
شعرا کلکی صفا وصف ائده آسان بزنیب
- دوشنبه
- 4
- مرداد
- 1400
- ساعت
- 15:28
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه