بیر خبر دور یازورام فاطمه اولسون کمکیم
یازا بیلسم اولاجاق اجرله سرشار اتکیم
هدفیم شعرده زهرا خانمون شوکتیدی
عرش و فرش ایچره اونون طنطنه ی دولتیدی
قادر آللّهون اونا قائل اولان حرمتیدی
قبری تک قدریده مجهوله قالان زهرادی
غصّه دن وقت شبابی قوجالان زهرادی
دُرّ نایاب سپهر ادبون اولدوزیدی
سوّمین پنج تن علیّه دی طاها قیزیدی
خوان احسان خداوند کریمون دوزیدی
محرم سرّ خفیاتیدی عالیّه صفات
بهترین ذکردی حُسنی' آدی روح حسنات
خانه ی کعبه ده ختم رُسُل ائتموشدی جلوس
نئچه اشرافی مشاهیر عربدن مأنوس
اولدیلار حضرته شوقیله الین ائتدیله بوس
صورا عرض ائتدیله ای فخر فخام ملکوت
ساحت اقدسی جبریله اولان رحل هبوط
گلمیشوک محضر پاکونده تاپاق آرامش
قلبمیزده ولی وار متفقاً بیر خواهش
گر چی اسرار ضمائرده واروندور دانش
بیر مجلّل طویمیز واردی قیزون دعوتدی
متبرّک قدمی هاردا اولا نعمتدی
دئدی پیغمبر رحمت دیرم دعوتوزی
حفظ ائدر فاطمه بی شبهه سیزون حرمتوزی
آرتیرار قویسا قدم مجلسوزه شوکتوزی
حاصل حضرت یتریب فاطمیه پیغامی
گوردی تشویشه دولاندی خانمون آرامی
دیله گلدی نبوی جنّتینون حوراسی
معرفت گلشنینون غالیه بو طوباسی
عرشیانون ابدی فاضله منصوراسی
بابا هر امر ایلسون لازمه سی اجرادی
اولارون نیّتی امّا منه استهزادی
متموّلدی بیلورسن او یهودیّه زنان
واردی شوهرلرینون ثروت بسیار و کلان
شال و دیبایه ملبّسدی خانملار شادان
مین قلم زینت ائدر جشنه گلنلر اوزینه
خار ایستور ساچا هر تک تکی زهرا گوزینه
سن بیلورسن کی منیم یوخدی زر و زیب و طلا
کیم گوروب فاطمه دستبند آلا خلخال سالا
ظاهری زینته یوخ رغبتیم ای گنج ولا
مال دنیادن اوزون کی بلوسن واردی نئیم
کهنه چادردی باشیمدا بابا بیر پیرهنیم
من بو وضعیله گئدم طویدا سینار حرمتمیز
تاپاجاق خدشه بابا مکتبی حیثیتمیز
هتک حرمت اولا دُؤزمز نبوی غیرتمیز
اولارین وعده سی زهرایه شماتتدی بابا
سوزلری طعنه دی تحقیر و اهانتدی بابا
ائشیدیب بو سوزی تا فاطمه دن ختم رسول
اورگی قانه دونوب اولدی پیمبرده ملول
ناگهان حضرت جبریل امین ائتدی نزول
دئدی یا سیّدی آللّه سنه گوندردی سلام
صورا زهرایه ده بیر طرفه حکیمانه پیام
اوزی بو امره خدای ازلی وئردی رضا
تئز مهیّا ایله زهرا گئده حتماً او طویا
حکمت بارقه میز اوردا گرک ظاهر اولا
لاجرم بنت نبی دوردی ائدیب حمد و ثنا
گینوب کهنه لباسلارینی تئز دوشدی یولا
مندرس رختیله شه بانوی سلطان حجیز
ایکی دنیایه ملیکه ایکی دنیایه عزیز
تک گئدور جشنه نه وار خادمه کُلفَت نه کنیز
مو پریشاندی یوخیدی آناسی شانه ویرا
بزم اغیاره گئدور دل نگران کان حیا
گلدی گوگلرده ملکلر هاموسی افغانه
سوزیله راز و نیاز ایلدیلر سبحانه
اشک چشمانی گل عارضده دونوب بارانه
قویما آللّه دئدیلر فاطمه نی خوار اولسون
بی حیا دشمن ایچینده گوزی خونبار اولسون
سنی وئرّوک قسم آللّه آلیشان سینه لره
کاسه ی چشم یتیمانه دولان اشک تره
آه مظلومه شهیداندان آخان قانه گوره
صودامر بی گنه اطفالون آخان گوز یاشینا
سایه ی لطفوی سال زهره ی زهرا باشینا
زمزم و کوثر و تسنیم و صفا حرمتینه
مشعر و مروه و کعبیله منا حرمتینه
لوح و کرسی و جنان ارض و سما حرمتینه
خوان احسانوه لایقدی یقین شأن بتول
راضی اولما اولا دشمن آرا زهرانی ملول
میزبانیدی او طویدا نئچه بانوی یهود
هاموسی فاطمه نون دشمنی طاهایه حسود
باطنی نیّتی هر تک تکینون کفر آلود
دئدیلر قوی گله زهرانی پریشان ائلیک
بزنک سیم و زره شاد اورگین قان ائلیک
رحمت واسعه ی حضرت خلّاق جلیل
غلیان ایلدی بیر لحظه ده بی مثل و عدیل
بورودی فاطمه نی مهر خداوند جمیل
جوشه گلدی یم بخشنده ی ربّ الارباب
خازن جنّته فرمان یتشیب ایله شتاب
حاضر ایله نچه زیبنده و شایسته لباس
گورمیه دیده ی دنیا ایله بیر رخت و اساس
گیینه فاطمه حیران قالا سوسن گُل یاس
غبطه آرایشینه ایلیه طاووس جنان
قالا انگشت به دندان اوزی بلقیس زمان
اولمامیشدی چوخ ائویندن هله مرضیّه کنار
گوردی جبریل امین سویلدی آی ماه عذار
گلدی مشّاطه ی فردوس سنه خدمتکار
قویمادی مهربان آللّه سنی غمگین اولاسان
شدّت غصّه ده گُل مثلی خزاندا سولاسا
بلی آللّه بیرینی ایستسه تاپسون اعزاز
گوز ویریم آندا ید قدرتی ایلر اعجاز
فرشدن عرشه عروج ایلر اولار محرم راز
نجه گور دختر طاهانی سرافراز ایلدی
در گنجینه ی جنّاتی اونا باز ایلدی
الغرض زهره ی زهرا گینوب رخت جنان
زینت ایلوب اونا مشّاطه ی باغ رضوان
دوره سین آلدی نئچه مین نفر حوریّه زنان
بیری معطور ایلیور ماه لقا سیماسین
بیری آراسته ایلوردی قد رعناسین
غصّه دن فاطمه نون قلبی اولوب آسوده
دمبدم شکر ایلیور لطف حق معبوده
کاروان دوشدی یولا گلدی چاتیب مقصوده
خانمون دوره سینه هاله ویران حور و پری
دولدوروب صوت دل انگیزیله راه گذری
انتظاریدی خانملار طویا اجلاس نزول
ناگهان فاطمه گون تک ایلدی جشنه حلول
نور باران ایلدی مجلسی سیمای بتول
هر خانم دوشدی گوزی مونس حورا یوزینه
غش ائدیب مالک اولا بیلمدی ناچار اوزینه
عالم حیرتده قالا وار یری بو اقباله
هامی یا فاطمه دیلده چیخیب استقباله
گلینون کوکب بختی دوشوب اضمحلاله
عُلوی و سُلفی تماشایه چیخیب غوغادی
گوئیا جشن عروسی خانم زهرادی
او خانم قیزکی عروسی اونا اولموشدی بپا
حالدن گئتدی خانم فاطمه نی گورجک اودا
آیریلیب روحی بدندن طوی اولوب بزم عزا
گلین ئولدی آناسی باجیسی ویردی باشینا
نقل و شاباش دونوب خون دیله گوز یاشینا
سالدی بو حادثه مهمانلاری دریای غمه
آختاریدی هامی بیر چاره بروز اِلمه
گلدیلر فاطمه درگاهینه دفع ستمه
میهمانلار دئدی آی مؤمنه داداره خانم
گوریوک بیز سنی بیچاره لر چاره خانم
اولما راضی اولا بو جشن خانم بزم عزا
طوی لباسی چیخادیب جمله گیه رخت قرا
نجه اولسون بو خانملار گلینه نوحه سرا
بیر خانملیق ایله قویما طویمیز یاسه دونه
گلینون بخت چراغی آلیشان لحظه سونه
سنده کی واردی تقرّب بو قدر یزدانه
بزیوب قدرت الی پیکرون ای فرزانه
سن یقین سویگلی سن آللّها ای دردانه
دور دعا ایله بو حوریّه لر آمین دئسون
چاغیر آللّهوی مرده گلینه جان وئرسون
دوردی سرعتله وضو آلدی ملائک خدمه
اولدی قائم به صلات حضرت صاحب کرمه
دئدی رحم ایله الهی بو گرفتار غمه
سربلند ایلدون اوّل منی خوش واقعه ده
ایندی شرمنده دی زهرا بو آغیر ضایعه ده
سجده دن قوزامادی امّ ابیها باشینی
یالواروب آللّها صدقیله توکوب گوز یاشینی
مکّه نون نالیه زهرا گتریب داغ داشینی
دئدی یا ربّی محمّد و علی حرمتینه
قویما خجلتده منی فاطمه نون عصمتینه
گوز یاشلی هامی مبهوت باخوردی نگران
ناگهان مرده عروسی گوز آچیب عطسه زنان
دئدی یا فاطمه اوپدی ال ایاقیندن عیان
سن دعا ایلدون البته منی جان گتدیم
قسم آللّهه سنه قلبدن ایمان گتدیم
باوریم اولدی جهانی یارادان آللّهدی
آتون احمد قسم آللّهه رسول اللّهدی
نیّتون پاک هدفون قربتاً الی اللّهدی
گلینون سوزلری مهمانلارا میزان اولدی
یدّی یوز فرد یهودیّه مسلمان اولدی
او جلالتده خانم فاطمه گور چکدی نلر
هیجده ساله اوزی حامله درک ائتدی خطر
سقط اولوب محسنی قانه بویانیب غنچه ی تر
آنا بیر یاندا یخیلدی بالاسی بیر طرفه
شرمدن دردینی بیلدیرمدی شاه نجفه
سسلدی فضّه کمک ایله بویاندیم قانه
اریدی شمع وجودیم کول اولوب پروانه
ایکی عاشق قانا آغشته دوشوب یان یانه
محسنیم آچمادی گوز بیر آناسین رؤیت ائده
- دوشنبه
- 4
- مرداد
- 1400
- ساعت
- 15:31
- نوشته شده توسط
- یوسف اکبری
ادامه مطلب
