مسلمم کوفه ده آزاده مرام آختارورام
اهل قرآن و طرفدار امام آختارورام
گوندریبدور منی بو شهره حسین بن علی
بیر حسین کی اونی تأیید ایلیوب ربّ جلی
حکم قرآنیله همسودی سراپا عملی
بئله بیر رهبره تشکیل نظام آختارورام
کیم طرفدار اولا دنیاده حقیقت سوزینه
قویماسین پرده ی غفلت اولا حایل گوزینه
بیر تکان وئرسین اورک ملکینه گلسین اوزینه
یِمین بیر تیکه عمرینده حرام آختارورام
قویمیون تار ائده مرآت دیلی گرد و غبار
اولمیون تابع دستور یزید همه کار
سوز حسینوندی او ساعت کی قیامت قورولار
سسلنر هاردادی یاران گرام آختارورام
مرتضی اوغلیدی پیغمبر خاتم نوه سی
فخر ائدردی اونا انسیّه ی حورا نه نه سی
یازدیقوز نامه لرین عرشه چیخوب طنطنه سی
هارداسوز بس سیزی ای اهل قیام آختارورام
رخت تزویر و ریادن اوزوزی پاک ائلیون
چالشون خیره ولی شرّدن امساک ائلیون
توسن عشقی بو میدانده چالاک ائلیون
دوز یولا دوز هدفه مرد همام آختارورام
دولت وقته خلیفیدی او هنگامه یزید
ائشیدن لحظه غضبلندی بو اخباری شدید
یازدی بیر نامه زیاد اوغلینا شیطان پلید
کوفیه گئت ندی گور شور پیام آختارورام
کوفیه گلدی شبانه او دنی سرعتلن
سوروشوب مسلمون احوالینی چوخ دقتلن
سالدی تعقیبینه بیر عدّه قشون جرئتلن
تئز سالون دامه دئدی لذّت کام آختارورام
الغرض مسلمی کشف ایلدیلر هاردا یاتیب
چکدیلر کوچیه ایش منطق دعوایه چاتیب
گوردی یوخ چاره عقیل اوغلی الین تیغه آتیب
دئدی وار میلوز اگر جنگه ظلام آختارورام
من سیزون هاموزی فکر ایلدیم اوّلده بصیر
آلدوز اطرافیمی بیعت ایلدوز لا تأخیر
نه تئز اولدوز من بی یاردن ای یاران سیر
دوز مسلمانی نه اشرار لئام آختارورام
چکدیلر دامنه ی جنگی به حال عجله
کوچه لر تنگدی چون وادی سوق جبله
یکه میدانیدی وسعتلی او خونبار عمله
هامی جنگ ائتمگه سسلردی حسام آختارورام
اهل بازار او هیاهوده اوزین گوردی مُجاز
دوردی تئز باغلادی دکانلارینی قوم مَجاز
واریدی بیر نفر آهنگر گاو آهن ساز
ایندی بوردان سوزومه ربط کلام آختارورام
کارگاهینده او آهنگر کوفی نسبون
نئچه شاگردی واریدی ایشه مشغول عربون
بیری ایرانی الاصلیدی چوخالسون عجبون
او روانشاده وئرم دیلده سلام آختارورام
کاتبی ( کورت فریشلردی ) اوزی آلمانی
یازور عباس بذائیدی همان ایرانی
اردبیل اهلیدی مشروح او غیرت کانی
فرصت کافی بو مضمونی یازام آختارورام
گئت مرور ایله نویسنده یازان اسنادی
اردبیلون او زمانلاردا بذادور آدی
آدلانیب عشق حسینی لن اودور بنیادی
منده بو عشق همایونی مدام آختارورام
ذورق فکریمی بو مسئله سالمیشدی گِله
گتیرردی منی چوخ قلبده گه گاه دیله
وار حسینون نه سببدن نظری اردبیله
ایندی بیلدیم ندی بو شهرت و نام آختارورام
بگنیبدور آقا بو شهری همین اسناده
دولت عشق حسین وار اودی بو مأواده
شامل اولسون بیزه لطفی هر ایکی دنیاده
مجلس یاسین اودور صبحیله شام آختارورام
گئتمیوم حاشیه چوخ مطلبی تعقیب ائلیوم
صادق عاشقلری بو نیّته ترغیب ائلیوم
شبنم اشکیله گول عارضی تذهیب ائلیوم
قفس فیضده قمری لره دام آختارورام
مین نفر دوره لیوب مسلمی ایلولّه جدال
گوردی بو صحنه نی عبّاس بذائی فی الحال
مسلمون حالینه یاندی اورگی تاپدی ملال
دئدی بیر اسلحه ی کاری تاپام آختارورام
الغرض جوشه گلیب قلبده غیرت کانی
ال آتوب چکُّشه ترک ایلدی تئز دکانی
حمله ور اولدی یزیدی لره اول ایرانی
چکدی بیر نعره گلون ارذل انام آختارورام
بیر نفر مسلمان جوان مسلمه غمخوار اولدی
ترکزاده اوزی ایرانی اونا یار اولدی
اوّل عبّاسه شهادت یولی هموار اولدی
بیر ایله شخصه اولام منده غلام آختارورام
امر اولوب دشمن دین ال ویرا هر ترفنده
دستگیر ایلیلر مسلمی امّا زنده
جنگ طولانی اولوب قالمادی یارا تنده
گل اجل سسلدی احسان ایله جام آختارورام
ویردیلار یاره ز بس گئتدی قوادن بدنی
بوریوب قان ائله بیل لاله دوتوبدور چمنی
یا نگین اوسته نمایاندی عقیق یمنی
یخیلبدور دمیور حال قیام آختارورام
صر صر کینه یخیب سروی نگونسار ائتدی
بکر بیر تیغ ویریب مسلمی خونبار ائتدی
آغزی قانیله دولوب صحبتی دشوار ائتدی
دئدی جنّت سوینا بیع سهام آختارورام
فلکون رسمدی هر عصرده ترویج ستم
مسلمون قولّارینی باغلادیلار قوم ظلم
یاره چوخ مرکبی یوخ گلمیور آتدوقجا قدم
گئدور اعدام اولونا شخص فهام آختارورام
یاره لی شیر گلیب محفل استبداده
اعتنا ایلمدی مستبده آزاده
گوردی طاهانی گلیب الده بهشتی باده
ظهردن عرض ایلدی آب و طعام آختارورام
شاد اولوب مسلمی خونپاش گوروب ابن زیاد
حکم اعدامینی صادر ایلدی تخم عناد
چاغیروب بکری اشاریله دئدی حیله نهاد
کس باشین من شعف حاکم شام آختارورام
مسلمی دارالحکومه دامینا چکدی عدو
سو تقاضا ایلدی مسلم ایچه وئرمدی سو
دئدی معناده اونا فاطمه گل الده سبو
سنی جناتده چوخداندی خرام آختارورام
گوردی مسلم داخی سلب اولدی اونا عیش حیات
دوندریب یثربه اوز سویلدی ای باب نجات
کمکیم یوخدی قولوم باغلی اسیر نفرات
ئولورم من ولی اسلامه قوام آختارورام
پشت بام اوسته کسیبلر او غریبین باشین
گتیریب نالیه احوالی چولین داغ داشین
یا حسین سسلدی توکدی یوزونه گوز یاشین
وای دئدی یوخدی باشیم اوسته آنام آختارورام
یاز "صفا" شکر ایله بو نعمت کرمنایه
سوق عقبایه گوزل جمع ایلدون سرمایه
مکتبی شاعره قرآندادا وار چوخ آیه
منصبون خوشدی دئمه آیری مقام آختارورام
- دوشنبه
- 4
- مرداد
- 1400
- ساعت
- 15:46
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه