دوتموشدی حسین پاره ی قرآنی الینده
میدانی گزور اصغر عطشانی الینده
رحم ایلیون ای قوم بویوردی بو اوشاقه
حرمت بیلسوز شرعده واجبدی قوناقه
کیمدور گله بیر جرعه سو جامیله قباقه
اللّهه گوره کاسه ی احسانی الینده
غنچم سارالیب صر صر ظلمون وزشیندن
جان اوسته دی دیلسیز بالا گوردوم روشیندن
گتدیم سو ایچوب دینجله تاب و طپشیندن
شش ماهه دی یوخ خنجر بُرّانی الینده
آغوشیمه آلدیم کی آیردیم آناسیندان
گوردوم نگراندی آنا دیلسیز بالا سیندان
شرمندیدی بولمدی اوپسون هارا سیندان
قالموشدی ربابون قوری پستانی الینده
بو شرح و بیان دشمنی گتدی هیجانه
سعد اوغلی گوروب ایش دولانور گلدی بیانه
امر ایتدی گیدوب حرمله سرعتله نشانه
آماده ایدوب زهرلی پیکانی الینده
بو طفلون ایشین من دیدی السّاعه قوتارّام
اوچ شعبه لی پیکانله آسوده سوارّام
سو قویمارام ایچسین بوغازین تیریله یارّام
قالسین باباسی بُلبُل خوشخوانی الینده
اگلشدی قویوب حرمله بیر تیر کمانه
زهدن قوتاران اوخدا دیوردی یانا یانه
هاردا قوناقین قانه بویار صاحب خانه
یا اینکه سالار مشکله مهمانی الینده
اوخ گلدی هواده دیله ای ربّ مشیّت
هارداندی یولوم امر ایله ای قادر قدرت
امر اولدی کی قویما چکه محبوبیم اذیّت
گوزلر سنی چوخدان قوزی قربانی الینده
پرّان یتشوب خدمت سلطان حجازه
مأمورم علی اصغروه آلدی اجازه
اگلشدی اوخ اوندان سورا بیر تشنه بوغازه
رام اولدی حسینون بالا جیرانی الینده
القصّه بیتوب خار ستم گل بوداقیندا
اصغر بویانوب قانه حسینون قوجاقیندا
اما نه نه ال سینه ده اصغر سوراقیندا
آغلور دولانور زلف پریشانی الینده
آغ گل دولانوب لاله ی نُعمانه الهی
قالدی آتاسی بر سر باریک دو راهی
خونابه ی اشکیله قاتوب شعله ی آهی
بیلمور هارا گتسون گل خندانی الینده
صبح اولدوزی عشقین سحرین گورمدی باتدی
باخ بیر سودامر عاشقه اوز مادرین آتدی
سلطان شهیدانیله بیر قبرده یاتدی
اما بوغازیندن توکولن قانی الینده
یوز دوتدی حسین خالق محبوب و جلیله
اللّه ندی قیمت دیدی بو خون قلیله
سس گلدی همین قاندی شفاعتده وسیله
اوتدان قوتاریب ساخلار احبّانی الینده
هر شیعه عزادار اولا دلبند بتوله
حُرّه وهبه اصغره اولاد رسوله
طاعاتی یقیناً یتیشر حدّ قبوله
اما اولا سرمایه ی ایمانی الینده
بیر عمریدی مأنوس غم آل عبایم
هم جمع پریشان تکایای عزایم
من ناصرم اما شعرا ایچره "صفا"یم
هر شاعرون اولسون گرک عنوانی الینده
- دوشنبه
- 4
- مرداد
- 1400
- ساعت
- 20:43
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه