بو گون بیر گوندی عاشورا دیوللر
حسین عاشقلری قاره گیوللر
بو گون قان آغلیور عرش الهی
سو اوسته اولدوروبلر تشنه شاهی
او شاهی که شه جنّ و بشردی
نهال عمر زهرایه ثمردی
حسین بن علی دنیایه جاندی
وضوسی قان وجودی لخته قاندی
ایشتدیم بو سوزی بیر منبریدن
دیوردی روز عاشورا به شیون
ویروبدی شیعیانه بو پیامی
امام جعفر صادق کلامی
تمام ماسوا یوم بلاده
حسینه آغلیوبلار بی اراده
عذاره هامّی گوزدن قان توکوبدی
یره قان عرشدن سبحان توکوبدی
بو امره شیعیانه وار اجازه
هامی قان آغلاسون شاه حجازه
اوزین مولاسینه همرنگ قیلسون
حسینیم وای دیوب باشینه ویرسون
نجه زینب یاریب محملده باشین
یارار بیر عدّه وار گزلنده باشین
حسینون جسمی اولدی پاره پاره
او پاره جسم اولوب هر درده چاره
گرک قانه باتاق بیز بو عزاده
آچار مشکلّری یوم جزاده
حسینون قاره سینی باشه باغلا
عزا بزمینده ایلش سنده آغلا
اوچان قوشلاردا سیریندن دایانسون
باخوب بیگانه بو احواله یانسون
سعادت اولمادی یوم بلاده
چاتاخ کامه دیار کربلاده
آقام تشنه دوشنده قتلگاهه
دینده هل معینی اول سپاهه
دیردوک شوقیله مولایه لبیک
عزیز حضرت زهرایه لبیک
بو گون دنیا گرک ویران اولیدی
آخار سو شطّون ایچره قان اولیدی
سو ایچدی چوللّرون هرزه گیاهی
سو سوز جان ویردی عالملر پناهی
باشین دالدان کسوب شمر ستمگر
گلوبدی نالیه خاتون محشر
قرا باشه سالیب جنّتده زهرا
اوغول وای سسلدی ای شیعه مولا
عزا دوتدی حسینه ذات یکتا
اولوبدی ماسوا کلّاً معزّا
بهشت عدنده باش آچدی لعیا
حسینیم وای دیوب آغلاردی سارا
پوزولدی نظم عالم قوپدی غوغا
یتشدی تلّدن زینبده گویا
حسینی گوردی جان اوسته او علیا
باجون قربان دیدی ای روح طاها
اولوب گل پیکرون قانیله حمرا
آچیب گل یاره لردن جسم زیبا
چکور حسرت او جسم شاخ طوبا
دیلینده ورد و ذکری رب الاعلا
دعا ایلوردی خواهانین او اثنا
عزاداریله زوّارین سرا پا
اولار جنّت منه اوندا گوارا
"صفا" اولسون منیم مهمانیم اوردا
- دوشنبه
- 4
- مرداد
- 1400
- ساعت
- 21:8
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه