یتیشنده قتلگاهه حرم شه شهادت
ایله بیر قیامت اولدی اونا رستخیز علامت
هانی رستخیز اعظم؟ هانی اوندا قانلی میدان؟
هانی اوندا بو جماعت، هانی جمع دل پریشان؟
هانی اوندا بیر سو اوسته،توکولن نجوم رخشان؟
هانی اوندا غرقه در خون، مه و مهر چرخ رفعت
هاچان عرصه گاه محشر اولاجاقدی قانلی دریا
وورواجاق او قاندا غوطه، بیر او قدر پیر و برنا
کیمی پاره پاره پیکر، کیمی قطعه قطعه اعضا
کیمی آفتاب طلعت، کیمی شور حشر قامت
کیمی پیر سالخورده، اوزی روزگار دیده
که خضاب قان حناسی، او محاسن سفیده
کیمی سی اون اوچ یاشندا، قد سروی نو رسیده
کیمی طفل شیرخواره، کیمی نورس صباحت
کیمی نوجوان که مثلین گورن اولمیوب سبقده
دوتوب عارضین قزل قان دیه سن که گون شفقده
یارالی بدن او خندان گله بنذیری طبقده
که لطیف شاخ و برگی گوره خاردن مین آفت
هانی بیر چمن تاپولسون بئله گل ایله چمنده؟
هانی بو لطافت اولسون گل سرخ یاسمنده
هانی بیر او قدر نکهت اولا سوسن و سمنده
اودور ایلیوب بئله گل او دیاری رشگ جنت
کیمی بیر جوان که مثلین گوره حاش پیرگردون
یوزی رشگ بدر کامل، قدی رشگ سرو موزون
لب لعلی آب حیوان، اوزی تشنه لب، جگر خون
ایچوب اوز قانین که چکمز سودان اوتری مرد منت
یخلوب کنار نهره، او یگانه مرد جنگی
نجه جزر و مد دریا، وورا ساحله نهنگی
او وجود هیبتیندن بولانوب فرات رنگی
گوره سن او دجله خون، گوتوروب نقدر هیبت
ویروب اللرین سو اوسته، ایلیوب سویی مسخر
اولا روز و شب او دریا، او سو اوسته دور او اللر
اگر اولمیا او اللر، او سو بیر تلاطم ایلر
که بلای نوح طوفان، اولی بیر ستوده نعمت
تاپا گر همای فکرت، بو فضاده اوج عنقا
گورر اوندا سو کنارین، نیه مسکن ایتدی سقا
وورا اود شرار حسرت، که یانار فرات حقا
کسه گر او قانلی گوزلر، او سودان سرشگ حسرت
یری واردی سلسبیله که فرات ایده مباهات
ایله گوز، او اشگ حسرت، گوره سلسبیل هیهات
ندی سلسبیل و کوثر، نه کنار نهر جنات
اولا کاش ایکی جهاندان منه بیر فرات قسمت
دایانام کنار نهره، او سویا ایدم اشاره
قان اولا آخا سرشگیم، او فرات تک عذاره
سو ویرم گوزوم یاشیله من او سرو جویباره
باشیما او سرو قامت، سالا سایه عنایت
کیمی سود امر که پستان اونا زهردار پیکان
نه سود اولدی نه سو تاپدی، سوسوزوندان ایچدی القان
ایلیوب او آغ قماطین بوغازی قانیله الوان
سارالان سولان او غنچه، نه گوزل تاپوب طراوت
ایله غنچه که او گلشن دولوسی گله مقابل
ندی غنچه، بیر گوزلده هانی بو گوزل شمایل
او شمایله قانیله ویریلوب او زیب کامل
که تعجبیله قویموش هامی یوزده دست حسرت
اسه گر خزان سمومی، سولا گلشن زمانه
نه قالار اثر گلیندن، و نه غنچه و نشانه
اولی باد نوبهاری یته گر بو گلستانه
که نسیم ایدر سمومی، وار او غنچه ده لیاقت
دیمورم بو غنچه ساخلار، ایله گلشنی خزاندان
یری وار بو غنچه گیتسه، گیده روح گلستاندان
آلا آب و تاب رنگی، گل سرخ ضمیراندان
او قیزل قانیله گلگون، عطشیله رنگ صورت
هاچان عرصه گاه محشر، دوشه جاق بو ابتلایه
که سم سمند اعدا، یته مصحف خدایه
داغیلا صحیفه الله، یر اوزونده آیه آیه
نه نشانه سوزلریندن و نه آیه لر سلامت
قالا آیه لر سلامت نجه مصحف خداده
که هر آیه کلمه کلمه، دوشه صفحه ثراده
بلشه او خاک و خونه، ایله حددن زیاده
که گورونمیه باخاندا، مگر ایله قانلی تربت
هاچان عرصه گاه محشر، گوره جاق بو وضع حالی
بئله دستگیر اعدا، اولا مصطفی عیالی
کیمی نین وجودی نیلی، کیمی یوز گوزی یارالی
کیمی نین دوداقی پاره، کیمی نین قولاق جراحت
کیمی نین باشندا ساتر، بیر عبای پاره پاره
کیمی نین گمانی گلمز، نه عبایه نه خماره
کیمی خجلتیله ینگین ایلیوب نقاب عذاره
کیمی نین یوزینده زلف سیهی حجاب عصمت
کیمی خواهر شهنشه، هر ایکی جهانه بانو
او جلالتیله رشته بیلگینده بند بازو
یورولوب دوشوب کمنده، دیه سن یارالی آهو
او غزاله کعب نیزه، یتشوب تاپوب اصابت
کیمی طفل نازپرور، علویه شاهزاده
گیدوب عزتی الیندن، اورگی سینق فتاده
ایاقی قابار یارالی او قدر قاچوب پیاده
سر و صورتینده غمدن، اوتوروب غبار محنت
- دوشنبه
- 8
- شهریور
- 1400
- ساعت
- 22:40
- نوشته شده توسط
- یوسف اکبری
ارسال دیدگاه