صبح عاشورا آچیلدی خوان عشق
دعوت اولدی یتمیش اوچ مهمان عشق
گتّدیلر معناده عشرت باده سین
گلدی فرزانه قدح نوشان عشق
ایچدیلر لاجرعه وحدت جامینی
مست اولوبلار جمله سرمستان عشق
تشنه ی جام شهادت لشگری
باش و جانیندن کچن اعوان عشق
مادّی دنیادن تبرّی' ایلین
ساحت حقّه ایدن اعلان عشق
جان متاعین بی تمنّا بذل ایدن
والهان وادی شایان عشق
شوقلن ایفای تکلیف ایتمگه
گیدیلر بیر بیر کفن یاران عشق
بیر قوجا سیّد قلیل اصحابلن
باغلیوب آللّهلن پیمان عشق
سرور و شاه شهیداندی ئوزی
سرمد و سرخیل سربازان عشق
سالکان عشق ایدیب طیّ طریق
مُهر اولوندی دفتر هجران عشق
قالدی بیر پیر مغان بیر موج غم
شعله لندی شعله ی سوزان عشق
حاجیان عشقی گوردی غوطه ور
عشق دریا سینده وار طوفان عشق
دوندریب یوز ساحت معبودینه
عرض ایدیب ای شاهد میدان عشق
بو جوانلاریم بو انصاریم منیم
قان ایچینده غرقدور خوبان عشق
ویردیم اکبر عمریمون سرمایه سین
اکبریم سنسن اودور تاوان عشق
اصغریم حاشا ملول ایتسون منی
سن معلّمسن اولار طفلان عشق
دوشموش عباسون قولی تندن جدا
منده واجبدور اولام قربان عشق
سن رضا اول من قضایه راضیم
محترمدور عاشقه فرمان عشق
گیموشم من عترتیمدن بی خبر
آغ کفن جسمیم اولوب ویلان عشق
کاش ایدیدون اولمه میش خوشدل منی
عفو اولار آیا عزاداران عشق
گوئیا گلدی ندا محبوب من
ناگران اولما طرفداران عشق
قویمارام یانسون شرار دوزخه
هر حسینچی گر اولا عصیان عشق
هر نقدر اولسا گناهی حشرده
امر قیلّام بوشلیون احسان عشق
نه عزاداران نه زوّارون یانار
جوش ایدر اوندا یم غفران عشق
مژده ویر مندن هامی احبابوه
عدنه قیمتدور آخان باران عشق
گتّدی بو سوز شور بسیار عاشقه
آرتریب هی شوق دیدار عاشقه
عفو قولین ویردی تا دادار عشق
گرم اولوب عشّاق آرا بازار عشق
عترتین یادّان چیخاردیب شوقدن
تز گرک اولسون دیدی دیدار عشق
جَنَّتُ مِن تحت الانهار ده
ایندی شاداندور گزور انصار عشق
گوزلیور الان منی زهرا آنام
الده سو جامی گل بی خار عشق
ایستیوب تز مرکب رهوارینی
اولدی آماده شه دربار عشق
سسلدی زینب گل ای غم همدمی
گول باجیم ای محرم اسرار عشق
اول مهیّا آیرلیق هنگامیدور
گوزلروندن توک دُر شهوار عشق
قول بویون اول منله با هم آغلاشاق
گل گدور الدن حسین سالار عشق
قالدی روز محشره دیدارمیز
بو بالالاریم بو سن بو بار عشق
بار غمدن چوخ گلایه ایلمه
نوشدی عاشقلره آزار عشق
شامه قول باغلی چکر اعدا سنی
ثبت اولوبدی لوحه بو طومار عشق
چوخ مصیبت وار سنه مندن سورا
صابر اول ارزش تاپا آثار عشق
شمره یالوارما کسنده باشیمی
یاره دی قاندی ره هموار عشق
گوز گوتورمه قیزلاریمدان خیمه ده
تک قالا مشکلدی چوخ بیمار عشق
چوخ اوزوندن چیخما افغان ایلمه
قویما سینسون دولت بیدار عشق
قان نهال دینه واجبدور بو گون
تا صفا تاپسون گل گلزار عشق
الغرض آیریلدی قارداشدان باجی
رزمگاهه گلدی پرچمدار عشق
سسلدی ای کوفیان بی وفا
اولمادوز شایسته مهماندار عشق
سیز منی دعوت ایدوبسوز بو یره
ایلیورسوز بس ندن انکار عشق
من حسینم فاطمه ایستکلسی
قطب عالم محور پرگار عشق
مصطفی' دلبندیم حیدر بابام
بیزدن اوتری خلق اولوب اخیار عشق
کیم منه یار اولسا یانماز دوزخه
اولمیون غافل منم معیار عشق
رهبروز مرتدّدی مسلم منم
ایتمیوز بیجا اونا اظهار عشق
اولدوروبسوز تشنه قربانلاریمی
قانیلن تحریر اولوب اقرار عشق
منده قانلی دستمازه حاضرم
وار قضا امرینده بو پندار عشق
تز آلون آغوشه ای شمشیرلر
جسمیمی اولسون حسینی مفتخر
لطف حقدن بخت اولوب یار عاشقه
گلدی بیر اوخ اولدی زوّار عاشقه
سجده گاهین یاردی قان جاری اولوب
اولدی گوزلرده جهان تار عاشقه
لخته لندی قان جمال اللّهده
سدّ اولوبدی راه دیدار عاشقه
ال آتیب یالقوز امام ئوز کوینگین
سیلمکه قان اولدی دستار عاشقه
یوز گوزین سیلدی ولی ای شیعه لر
گور نه ظلم اولدی پدیدار عاشقه
من نجه آللّه اونی انشا ایدیم
لطف قیل توفیق بسیار عاشقه
کوینگی لن پاک ایدنده قانینی
سینه سی اولدی نمودار عاشقه
فرصتی گوردی غنیمت بیر شقی
چکدی بیر طرح نگونسار عاشقه
تز کمانه قویدی بیر اوچ شعبه اوخ
ویردی قلبیندن او بی یار عاشقه
آللّه آللّه اوندا زهرا نیلدی
اولدی نه نوعی هوادار عاشقه
عالم معناده قویدی اللّرین
قلبینه یاندی وفادار عاشقه
وای بالام ای وای حسینیم سسلدی
توکدی گوزدن اشک خونبار عاشقه
سس قوشوب زهرایه زینبده یقین
خیمه ده جان دیدی تکرار عاشقه
زهرلی اوچ شعبه بیر اوخ نیلیور
فکر ایدوز گور دگسه حضّار عاشقه
قلب ایوین یاردی قفادن چیخدی اوخ
دم بدم دَم اولدی دشوار عاشقه
گتدی یاراسی یخیلدی زینیدن
نیزه لردن واردی غمخوار عاشقه
یاره لر آغزین آچیب فواره تک
آغلیوردی گوگده قوشلار عاشقه
بیر حزین سسلر گلور اطرافدن
او تباکا مَن بکا وار عاشقه
اوخشیور زهرا یر اوسته آغلیور
کربلا دشتینده نیزار عاشقه
قان دوتوبدور گوزلرین گورمور آقام
باغلانوبدی دست پیکار عاشقه
قورخوسیندان گزلننلر گلدیلر
بیر یارا ویرسونلا ناچار عاشقه
اوخ اوخ اوستن سانجلیب یاللعجب
سینه سین ایلوبدی گلزار عاشقه
واردی یر سینمده هی سسلور گلون
یار ئوزی بو رنجی خوشلار عاشقه
سیزده یوخ تقصیر شرم ایتسون آتان
ویرماسونلار بسدی آزار عاشقه
یوخ غمیم اولسمده زینب تک باجیم
وار اولونجه آغلار اوخشار عاشقه
یا حسین لطف ایله بیر توفیق عطا
رونق بزم عزا اولسون "صفا"
- دوشنبه
- 4
- مرداد
- 1400
- ساعت
- 21:9
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه