دمیشدیم ئولمسم قبر اوسته گلّم شامدن قارداش
گتردیم خسته قزلارون قوتارمیش دامدن قارداش
عجب یار اولدی بختیم عهدیمه قیلدیم وفا گلدیم
اوره ک داغلی سینم یاره باشیمدا وار قرا گلدیم
قورام بو چولده شوقیله سنه بزم عزا گلدیم
خم اولمیش قامتیم امّا غم ایّامدن قارداش
منیم تک خردا قزلارون یانور نار فراقونده
فراموش ایتمشوک بیز رنج راهی اشتیاقونده
او قیزکی حیف اولا دائم یاتیرداردون قوجاقونده
خجالت گلمیشم اول طفل پر آلامدن قارداش
گزوب شاماتی القصّه بلورسن چوخ بلا چکدوک
گینه وار حمدی دیداره عزیزیم اولمدوک گلدوک
غم ایّامدن بیر قدری بو دنیاده دینجلدوک
یزیدون گوندوزین تار ایلدیم هر شامدن قارداش
مسیر راهده مسروریدیم شوق زیارتّدن
رقیّون گلمدی قان اولدی باغریم بو حکایتّدن
او بیزدن تز قوتاردی شامده قید اسارتّدن
گوروشجک سنلن آیریلدی صف ایتامدن قارداش
دانشسام خاطراتین موبمو قلبون دونر قانه
قوجاقیمده دولاندیردیم دانشدیردیم عزیزانه
دولاندیم باشینه دائم اولونجه مثل پروانه
یانوب شمع وجودی طعنه ی ضلّامدن قارداش
آدی دیلدن دیله دوشدی غمی داغلی اورکلرده
شهیده گتّدی قبره نازدانم اولدی اللّرده
بالام اولمزدی از بس زجر اونی اینجتّدی چوللرده
آنام زهرا کیمین مجروحیدی اندامدن قارداش
باشیم سندن سورا چوخ دوشدی آخر شور و غوغایه
شریک اولموشدیم اوّل گون سنیله چون بو سودایه
کسیک باشونله گزدیم شام شهرین سایه به سایه
گورنلر سپدی کُل باشیمه پشت بامدن قارداش
گچنلر کچدی دنیاده یتشدوک عین مقصوده
اول دفترده یازدیر بو گلن زوّاری معبوده
شکسته قزلارون دیندیر بیر آز اولسونلا آسوده
سوله خوش گلمسوز لعل لب گلفامدن قارداش
کرم قیل پیشواز ایله اَخا یورقون قوناقلاری
گلن اهل عیالوندن دور استقبال ایله باری
گلوب ویرانه ده بیر دفعه ایتدون تازه دیداری
ثواب ایت بیرده جویا اول دل ارحامدن قارداش
علی و اکبرین عطرین آلوب لیلا گدیب هوشه
رباب آغلار باخور نهر فراته گاهی آغوشه
سریّه قاسمون نار فراقیندن ادیب توشه
قورولموش بزم الفت جرگه ی ناکامدن قارداش
صفایه لطف ایله بیر اربعینی بخت یار اولسون
دوروب ششگوشه قبرین دوره سینده اشکبار اولسون
گتیرسون قبروه بیر دسته زوّاریله زار اولسون
دادیزدیر جام وصلی مست اولا اول جامدن قارداش
حسین جان کیمیا دور تربتون اهل جهان سویلر
همین تربتدی هر درده حکیمانه دوا ایلر
یقین زیبنده قبر ایچره بو نوعیله دیوب سسلر
قوتار اوز قبروی تز سلطه ی صدامدن قارداش
- دوشنبه
- 4
- مرداد
- 1400
- ساعت
- 21:41
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه