جانیمی هجران آلیب آللّه جوادیم گلمدی
گوزلریم یولدا قالیب آللّه جوادیم گلمدی
گَل رها ایله اوغول غمدن منی جان اوسته یم
گوزلریم یولدا گزور هر آن سنی جان اوسته یم
زهردن اولموش دوداقلار سوسنی جان اوسته یم
جسمیمی جاندان سالیب آللّه جوادیم گلمدی
آز قالیب عمریم چراغی سمّیدن اولسون خموش
ایندی اوغلوم سمت یثربدن گلر سبزینه پوش
اشکلن گوزلر لبالب سینه سی آلامه توش
جان دوداقیمه گلیب آللّه جوادیم گلمدی
نار فرقتدن دوشوبدور پیکریم تاب و تبه
ایلورم گاهی توسّل منده عمّم زینبه
ایلسه زینب دعا نایل تئز اولّام مطلبه
جان چیخور گوزلر آخیب آللّه جوادیم گلمدی
اضطرابیم وار پریشانم غریب و مبتلا
نه آنام زهرا ملاقاته گلیب نه مرتضی'
گَل منی آغوشه آل راحت چیخا جانیم بالا
لحظه ی غم باشلانیب آللّه جوادیم گلمدی
نه چتیندور ملک غربتده غریبون ئولمه سی
اولمیا شخصون کنارینده وئره جان بیر کسی
نه دواسی نه طبیبی نه اولا همناله سی
آهیم عرشه قوزانیب آللّه جوادیم گلمدی
گَل اوغول گل گوزلریم قربان گوزل رخساروه
گل رضا اولسون فدا گفتار شکّر باروه
سن مدد قیل منده گللم بیر گونی دیداروه
کوکب بختیم یاتیب آللّه جوادیم گلمدی
ای منه نایب مناب اوغلوم یتیش تئز دادیمه
سسلورم امداده تئز گل سعی ائله فریادیمه
طشتون ایچره گَل اوزون باخ دوغرانان اکبادیمه
باغریمی غملر یاریب آللّه جوادیم گلمدی
السّلام ای شاه اقلیم خراسان یا رضا
السّلام ای شهره ی آفاق ملک ارتضا
ایستیور سندن "صفا" توفیق شأن مرتضی'
لطف ائله اوجین آچیب آللّه جوادیم گلمدی
- سه شنبه
- 5
- مرداد
- 1400
- ساعت
- 11:1
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه