ای دوشن مشکله صدقیله چاغیر یا زینب
چاغیران صدقیله درمانین آلور یا زینب
جشن میلادیدی عرشه اوجالور یا زینب
هامی شادان زینب _ سنه قربان زینب
شام شهرینده یاتان _ اورگی قان زینب
شیعه لر جانی فدا باب الحوائج آدوا
سال بیزی غم گونی ای غملره مونس یادوا
اَل گوتور خالقه بو دوستلری ایله دعا
سنی قرآن زینب _ ایله احسان زینب
شام شهرینده یاتان _ اورگی قان زینب
دوشسه هر شیعه خانم مشکله سنده گوزی وار
کیم گلیب مجلس میلادوه گیزلین سوزی وار
بیر سفارش ایله مهدی گلیب حتماً ئوزی وار
اودا هر آن زینب _ سولیور جان زینب
شام شهرینده یاتان _ اورگی قان زینب
عید میلاد دوتوبدی سنه ارباب کمال
لطف ائله غملی اورکلردن اولا رفع ملال
ایکی دنیا اولا خواهانوزی فرخنده جلال
تاپا رجحان زینب _ سنه خواهان زینب
شام شهرینده یاتان _ اورگی قان زینب
یاتما غفلتده آچیب فاطمه احسان بابین
یولا سالماز الی بوش حقّه قسم احبابین
صدقله دوت اتکین هم خانم هم اربابین
چکر اوتدان زینب _ سیزی یاران زینب
شام شهرینده یاتان _ اورگی قان زینب
ائله کی قویدی قدم عالمه بو کنز ادب
آتاسیندان ئوزینه زین اب اخذ ائتدی لقب
دوداقین اوپدی قیزیم سسلدی ای شیرین لب
ندور افغان زینب _ اولما نالان زینب
شام شهرینده یاتان _ اورگی قان زینب
عُمروون خوش گونی آزدور نه سبب آغلورسان
زمزم اشکوی رخساره ندن باغلورسان
نیه قارداشون حسینون اورگین داغلورسان
اودا حیران زینب _ باخور الان زینب
شام شهرینده یاتان _ اورگی قان زینب
کنز اسراری هله خوشدی قالا سر بسته
گر چی تیهولریمی من گورورم پر بسته
قاچور آواره بویاندان اویانا هر دسته
گوزی گریان زینب _ اوزی ویلان زینب
شام شهرینده یاتان _ اورگی قان زینب
بالاجا گوزلرون آچ باخ گوزلیم قارداشوا
گور نه حسرتله باخور آخدیقجا گوز یاشوا
آغلاما جان باجی سویلر دولانیم من باشوا
گوزی جیران زینب _ تلی ریحان زینب
شام شهرینده یاتان _ اورگی قان زینب
- سه شنبه
- 5
- مرداد
- 1400
- ساعت
- 11:26
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه