مزاره تاپشریب زهرانی حیدر باغری قان گلدی
یارالی یاری قویدی تپراق آلتدا خسته جان گلدی
گلیب اوز دودمانینده اورکده نار جوّاله
حسین و زینبه خاطر اوجالدا بیلمیور ناله
غم فقدان زهراده دوشردی حالدن حاله
پریشان گوللره باخدیقجا اشک دیدگان گلدی
اورک آلامه پیچیده باخوردی غملی طفلانه
گلوبدی دورد مَلَر آهو آنا هجرینده افغانه
بتولی اوخشیور زینب اولار آغلور یانا یانه
او پوزقون جمعون حالینه فغانه عرشیان گلدی
آچیب غم دفترین مولا اوزیلن باشلیوب نجوا
دیور شرمندیم زهرا تن مجروحدن دردا
یارالی قبره تاپشردیم سنی ای گوهر یکتا
الیم گلمیدی استقبالوه اهل جنان گلدی
دئدیم گت دوقّوز ایل دوشدون منیم عشقیمده آزاره
گوزون قان صورتون نیلی سینون توش اولدی مسماره
اوزون پهلو شکسته داغلی قلبون غصّه دن یاره
اماندا ساخلا تپراق روح حیدر میهمان گلدی
ال آچدی مصطفی آلسون یارالی پیکرون مندن
دئدیم آل بو بالوندی جانه دویدی جور دشمندن
آتام شمشیره اَل نیلوم اجازم اولمادی سندن
چکم ناموسمی اوتدان صدای امتحان گلدی
ائویمده گورمدون خوش گون دچار درد و رنج اولدون
بهار عمرده دولدون گُله افسوس تز سولدون
پر و بالون شکست اولدی گونی گوندن غمه دولدون
ئولومدن ایسته دون چاره هرایه بی امان گلدی
دیردیم زینبین با هم جهاز و جامه سین آللوق
اونی چوخ فخریله بیز بخت اتاقینه یولا ساللوق
دوشنده مشکله ایولر ایوینده قیدینه قاللوق
زمانه قویمادی سندن آلا تاب و توان گلدی
علینی تک قویوب گتدون یتیشدون عین مقصوده
من اولدوم یار مهجوری سن اولدون غمدن آسوده
شهیده دهردن گتدون جوار حیّ معبوده
منه سندن سورا تکلیک بو شهر ایچره گران گلدی
نه دویدون زندگانیدن نه امّتدن وفا گوردون
در و دیوار آرا دوشدون یارا اوستن یارا گوردون
علیدن نا امید اولدون خلایقدن جفا گوردون
هرایه سسلدون فضّه زن خلد آشیان گلدی
سینون مسماره توش اولدی یخیلدون قانوه غلطان
بالون سقط اولدی دین اوسته یازیلدی اولین قربان
آناسیندان قاباق محسن گدیب اوز جدینه مهمان
گلیب پیشوازینه حورا اوخور روح روان گلدی
نجه آرام ائدیم ایندی حسینی زینبی آیا
اوزوم داغلی سینم یاره رواندی گوز یاشیم حمرا
سیه پوشم پریشان مو سنه یاس دوتموشام زهرا
گوزوم یولدا گورم کیملر حزین و نوحه خوان گلدی
مریضم یا علی درد نهان و لا علاجیم وار
سنی زهرا کمک قیل لطفوه چوخ احتیاجیم وار
باشیمدا گُل آدوزدان فاخرم شایسته تاجیم وار
«صفا»یه گور هایاندان بو بلیّه ارمغان گلدی
- سه شنبه
- ۵
- مرداد
- ۱۴۰۰
- ساعت
- ۱۱:۴۵
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه