اگر جوان ئوله عالمده آغلادار جوانی
آتا بئلی بوکولر غصّیه سالار آنانی
مصیبتی اثر ایلر باجسی قارداشینا
گلنده آدی گئچن گونلری دوشر یادینا
بو یرده اهل دل اولسا آلار سوزی مندن
تصور ایلسه آغلار دولار گوزی غمدن
یقین سالاندا یولا اوغلون هر آتا سفره
دعا ایلر آناسی دوشمه سون بالا خطره
جوان گئدر سفره قورتولوب گئدر سوزلر
ولی آتا آناسی هر زمان یولون گوزلر
گلنده رسم بودور کیم گئدر قباقینه
ئوپر یوزوندن اونون گل سپر ایاقینه
هامیدان اوّل آتاسی گلر وقاریلن
سیلر بالا یوزونی دولسا گر غباریلن
محبتیله چکر اوغلونی آتا قولونا
الین چکر باشنا بیر باخار اوجا بویونا
گر اولسا قارداشینون آرخاسی دورار قارداش
ایکی الّی قارداشینان قول بویون اولار قارداش
عیالی اولسا دورار خانواده دن آرالی
دولار گوزی باخار حسرتله همسره یارالی
اگر اولا باجیسی فرقی یوخدی وار محرم
اویرده ئوزگه سی واردور و یا که نا محرم
قاچار سالار اوزینی بیر زمان ایاقلاارینا
دورار قویار دوداقین قارداشون دوداقلارینا
قویون دییوم سیزه نیلر او دم اوغول آناسی
اَسَر الی ایاقی گورسه یول گلیر بالاسی
باشون باسار سینیه عالمی ائدر حیران
دییر بو گوزلریوه آی بالا ننن قربان
بو یرده یادیوه سال کربلاده لیلانی
گورنده اکبرینی آز قالوب چیخا جانی
ئوپوب الین ایاقین بس که اول وفالیدی
قوجاقه آلمادی چون یوز گوزی یارالیدی
بس ایله «صادقی» چک اول مصیبته پرده
بوسوزلری ائشیده هر آنا دوشر درده
یاز اوخشاسون ،آغاما نوحه خواندور «عباسی»
نه اینکه گوز یاشی وار، چوخ گوزلدور احساسی
- پنج شنبه
- 7
- مرداد
- 1400
- ساعت
- 11:1
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه