ای ثامن الحجج کی آدوز جاودانه دور
سیزدن صورا تمام خلایق بهانه دور
سیزسوز هدف خداده فقط آفرینشه
باقی نه سوز یازیلسا آقا ناشیانه دور
سیزسوز نشانه حضرت ختمی رسالته
به به آتاندا نور خدادن نشانه دور
یر گوی سیزیله تاپدی قرار اولدی استوار
هر چند شاهکار خدا ماهرانه دور
الدن گلور فقط بو گرکدور یازام آقا
هرچند آزدی سوز ولی چوخ عاقلانه دور
یوسف کی وار ملاحتی بازار مصریده
گویچک لیقی اگر چه مثال زمانه دور
تشبیه ائدم اگر قمر و شمسه نوریزی
یازدوم ستاره یوسفی سوز عادلانه دور
سیزدن آلوبدی نورینی آی گون تاپوب ضیا
آی گون نه دور که سوزده گلور ذره دانه دور
وار مختصر سوزوم سنه یا ثامن الحجج
هرنه ئورکده واردی قسم صادقانه دور
چوخلار یازوب قصیده و شعر و غزل سیزه
من یازدیقوم صحیفده سوزلر ترانه دور
اما اگرنمک سپه سن شعریمه آقا
شعر اهلی اعتراف ائلیر شاعرانه دور
الده بهانه ایلیوب اشعاری « صادقی »
گلمیش الوزده واردی گوزی عاجزانه دور
- پنج شنبه
- 7
- مرداد
- 1400
- ساعت
- 12:30
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه